Kerber paih thlakin a awm

Wimbledon hmeichhe singles quarterfinal-ah world number 1 Angelique Kerber tan hmun a awm ve ta lo. Karleha tennis ranking chhuak tharah chuan Kerber hi ranking-a awm mekna 'a chung ber' aṭangin paih thlak a ni zui nghal ang.

Thawhṭanni zan Court 2-a inkhelah seeded 14-na Garbine Muguruza chuan darkar hnih leh minute 20 chhungin Kerber lakah hian 4-6, 6-4, 6-4 in hnehna a chang. Kerber hian world number 20 chin a hmachhawn hnuhnung vawi kuaah chak ni hmel a hmu lo!

Seeded pakhatna Kerber hian world number 1 dinhmun humhim turin a tawp berah semifinal a thlen a ngai a, quarterfinal pawh a luh zawh tak lohah chuan a dinhmun a hloh dawn tih a chiang. Last 16 inkhel pakhat zawkah seeded pahnihna Simona Halep chuan Victoria Azarenka lakah 7-6, 6-2 in hnehna a chang ve thung.

French Open finalist Halep-i'n semifinal a thleng a nih chuan world number 1 thar a ni thei dawn a, Romanian nula hi a sang pali zingah a inhlangkai zo lo a nih chuan second round-ah chak lo mah se world number 3 Karolina Pliskova chu a chung berah a awm dawn a ni.

Kum 29-a upa Kerber hian season hmasa khan Grand Slam pali zinga pahnih Australian Open leh US Open nomawi a chawi a, Wimbledon-ah final a lut bawk - Grand Slam vawi 23 champion tawh Serena Williams dinhmun luahlanin world number 1 a ni thei hial.

Mahse, kuminah Kerber-i'n result ṭha a nei hlei thei lo. Grand Slam tournament pathum khelh tawh chinah quarterfinal a thleng zo lo vek. US Open nomawi a kawl lai hum him tur chuan hard court-ah a insiamṭhat zui nghal a ngai dawn a ni.

Inkhel dang

Centre Court-ah Wimbledon vawi nga champion tawh Venus Williams chuan seeded 27-na Ana Konjuh chu 6-3, 6-2 in a hneh a, French Open champion Jelena Ostapenko pawhin a sang pariat zinga tel turin seeded palina Elina Svitolina chu 6-3, 7-6 (8-6) in a hneh ve bawk.

Rinkai ni phak lo Magdalena Rybarikova-i'n a vawi khat nana Grand Slam quarterfinal khel turin world number 135 Petra Martic chu 6-4, 2-6, 6-3 in a hneh ve bawk. World number 87 Rybarikova hian semifinal khel tur chuan Caroline Wozniacki 7-6, (7-4) 6-4 a hnehtu Coco Vandeweghe a paltlang leh a ngai ang.

Grass court inelna ngaihhlut Wimbledon-ah hian kum 33 chhung chu khawtual nula an thleng sang ngai lo. Kum 1984 hnua British hmeichhe quarterfinal lut hmasa ber ni turin Johanna Konta chuan inkhel inhnehtawk takah Caroline Garcia chu 7-6 (7-3), 4-6, 6-4 in a hneh ve bawk.