Leeds United-in Premier League khel dawn
Football ngainatute tan chanchin lawmawm a thleng leh ta. Zirtawpni zan khan Huddersfield Town-in an mikhual Championship-a pahnihna West Bromwich Albion 2-1 in an hneh a, Premier League khel turin pakhatna dinhmun luahtu Leeds United an tling. Inrinni zanah Stoke City-in an mual Britannia Stadium-ah pathumna Brentford 1-0 in an hneh a, Championship-ah Leeds United an champion.
Leeds United hi 2003-04 season khan Premier League aṭangin an relegate. Peacocks hi rawn kir leh mai tura ngaih ni mah se England-a football inelna sang ber an khelh hmain League One-ah te an tla thla a, kum 16 tehmeuh league hniam zawk an khelh hnuah an phu ang ngeiin Premier League khel turin an inhlangkai.
Hlauhthawnna nen
Leeds United hian season bul ṭan ṭha mah se an ringtawk lo. Season liam ta khan dinhmun ṭha taka an din tawh hnuah a tawp match hnuhnung paliah vawi thum chak loin vawi khat an inhnehtawk. Marcelo Bielsa hote hi pahnihna aṭanga pathumnaa an tlak thlak avangin playoff an khel a, first leg-ah 1-0 in khualmualah Derby County hneh mah se Elland Road-ah Frank Lampard-a hoten an lehthal.
Tun season-ah pawh Leeds United-in bul an ṭan chhe lo a, season chanve chhoah chetsual lai nei mah se February 15 aṭangin match nga chhung an chak zawn a, an phur vanglai takin Covid-19 vangin inkhelh chawlh a ngai. Hripui vanga buaina awm hnuah June 21 khan inelna an ṭan a, Cardiff City an hneh lo - hlauhthawnna a rawn let.
Leeds hnuaia awm West Brom leh Brentford te an chet ṭhat si avangin Marcelo Bielsa hote ngaih ngam takin an awm thei lo. Amaherawhchu Bielsa hian an elpui zinga mi Fulham 3-0 in an hneh a, hemi hnu hian table mawngphaha awm Luton Town nen inhnehtawk mah se match li chhung an chak zawn.
Match hnih khelh hmabak a la awmin Leeds United dinhmun a ṭha a, anmahni hnaihtu pahnin West Brom leh Brenford ten an khingpui an hneh lo ve ve avangin Bielsa hote Premier League khel turin an tling a, an champion nghal bawk. Nizan dar 6:30 khan Leeds United hian Derby County hmachhawn turin Pride Park Stadium an tlawh a, eng result pawh thleng se Leeds hmalam hun a khawih buai pha tawh lo.
An dang tawh
Leeds United hming lam rik rualin Paul Robinson, Nigel Martyn, Ian Harte, Lucas Radebe, Rio Ferdinand, Mark Viduka, Alan Smith, Lee Bowyer, Jonathan Woodgate, Robbie Keane, James Milner leh player dangte hming a rawn lang nghal zut zut ang. Amaherawhchu kum 16 a liam tawh a, tuna player-te chu mi hrang vek an ni tawh.
Club top scorer Patrick Bamford pawh khawvel huapin a lar pha lo a, English striker hian inelna hrang hrangah goal 17 a khung. Player pawimawh dang Jack Harrison, Ben White, Mateusz Klich, Hélder Costa, Stuart Dallas, Kalvin Phillips, Ezgjan Alioski leh Liam Cooper te pawh han fak chiam tur an la ni lo a, Premier League atan an ṭha tawk lo thei bawk.
Amaherawhchu heng player-te hian English club ropui ṭhin Leeds United chu Premier League khel turin an tlinpui. Chutih rualin manager erawh football khawvelah mi thar a ni tawh lo. Marcelo Bielsa hian Newell's Old Boys, Espanyol, Marseille, Lazio, Lille leh an ram team Argentina thlengin a lo enkawl tawh a, tunlai coach lar Pep Guardiola leh Mauricio Pochettino te pawhin an entawn a ni.
Mipui an insum zo lo
Leeds United neitu Andrea Radrizzani-a'n an club ṭantute pungkhawm lo turin ngen mah se Premier League khel tura an tlin bakah Championship-a an champion meuh chuan Leeds ṭantute an insum zo lo.
Leeds khelmual Elland Road kawtah mipui ṭhahnem tak an pungkhawm a, club neitu Radrizzani pawh a bang ta bik lo. Player-te nen Elland Road-ah West Brom inkhel hi an en ho a, an hlawhtlinna chan an lawm. Liverpool
ṭantute pawh Premier League an champion chiah kha chuan Anfield kawtah an pungkhawm a, an insum thei bik lo.
Club neitu Radrizzani chuan, "Ka hlim takzet, Leeds chhungkua ka lawmpui a, Premier League khelh hi kan phu. Leeds United hi English club zinga sulhnu nei ṭha leh khawvel pawhin a hmelhriat a ni a, an hun tawn hi a ropui takzet.
"Tun dinhmun kan thlen theihna atana mi pawimawh Marcelo Bielsa leh a player-te ka fak a, anni zarah tun hun thleng thei kan ni. Club tana rinawm tlat kan supporter-te chungah ka lawm takzet bawk," tiin a sawi a, tun hnaia thi club legend pahnih Norman Hunter leh Jack Charlton te hming lam riin, an hlawhtlinna chan an nang ve hman ta lo chu pawi a tih thu a sawi.
July 17, Zirtawpni
Huddersfield Town 2 - 1 West Bromwich Albion
July 18, Inrinni
Charlton Athletic 2 - 2 Wigan Athletic
Stoke City 1 - 0 Brentford
Blackburn Rovers 4 - 3 Reading
Fulham 5 - 3 Sheffield Wednesday
Hull City 0 - 1 Luton Town
Middlesbrough 1 - 3 Cardiff City
Preston North End 2 - 0 Birmingham City
Queens Park Rangers 4 - 3 Millwall
Swansea City 1 - 0 Bristol City
Nizan Inkhel - Result kan hre hman lo
Derby County 6:30 PM Leeds United
Barnsley 7:30 PM Nottingham Forest