Hammers tan Premier League a chiang

Premier League club hlun West Ham chuan English top flight football mangṭha mai an la zuam lo tih pholangin an elpui Watford chu 3-1 in an hneh a, season tharah Premier League an khelh chhunzawm dawn. Hammers tan Michail Antonio,Tomas Soucek leh Declan Rice-ten goal khat ṭheuh an khung a, Watford tana Troy Deeney goal khungin awmzia a nei lo. 

West Ham hian hnehna an chan avangin match hnih khelh tur la awmah relegation zone chu point rukin an tlansan a, chhiarkawp danah tlak theih dan la awm mah se 18-na Bournemouth leh 19-na Aston Villa nena an goal difference enin hei erawh a thlen a rinawm loh thung. 

Premier League inkhel dangah Burnley chuan 2-0 in Norwich City an hneh bawk a, Championship lama tla chiang tawh Canaries player Emiliano Buendia leh Josip Drmic te chu hnawhchhuah an ni. 

Zirtawpni zana Hammers-in Watford an mikhual hmain West Ham boss David Moyes chuan a player-te chu, "Thil tam tak tiam loin in theihna pholang zawk rawh u," a ti a, an pu thusawi hi a nauten an zawm ṭha hle. 

Norwich laka goal li khung hlim Antonio chuan minute rukna lekah goal hmahruai a rawn khung a, Soucek leh Rice ten goal khat ve ve an rawn khung zui - first half a nih hian Hammers-in 3-0 in hma an hruai fel der tawh!

Tlak hlau Watford tan Deeney chuan minute 49-naah a rawn khung ve leh a, goal dang erawh an thawk chhuak tawh lo - Watford hian match hnih khelh tur la awmah 18-na Bournemouth leh 19-na Aston Villa chu point thum chauhin an tlansan a, an dinhmun a chhe hle. 

Nigel Pearson-a enkawl Watford hian match hnih hmabak an la neihah Manchester City leh Arsenal an hmachhawn dawn bawk a, 'a hautak dawn' tih hi Premier League-a an inhamtan theih nana an hmabak hrilhfiahna awlsam ber a ni.

West Ham captain Mark Noble hi player langsar tia sawi tur ni lo mah se Hammers tan erawh legend a ni a, English football ngainatu zingah a hming hre lo an awm kher lo ang. Watford lakah amah chher liantu club tana a match 500-na a khel a, hriatreng tlak result nen a chhinchhiah. 

Kum 33 mi midfielder chuan, "Kum 17/18 liam taah kha chuan Upton Park-ah ticket ka neih loh avangin luh ruk dan ka zawng ṭhin. He club ṭan em em chung hian ka seilian a, he stadium aṭanga mel khat vel leka hlaa chengin ka chhungte pawhin an ṭan em em bawk - match 500 hial ka khelhsak ta a, hei hi a ni duhthusam chu," tiin a hlim thu a sawi. 

Noble chuan an inhamtan chungchang sawi zuiin, "Ka tan chuan ni duhawm tak a ni. He club hian Premier League-a inhamtan a phu a, chumi ti tur chuan kawng thui tak kan zawh a ni," a ti - Hammers hi chhiarkawp dana tla thei erawh an la ni. 

Cherries leh Villa hi an match hnuhnung pahnihah chak se, Hammers hi chak lo ve ve se, an point hmuh zat a inang dawn. Mahse, West Ham hi an goal difference -13 a ni a, Bournemouth (-25) leh Villa (-27) te nena chhutin an tlakna tur chuan thilmak a thlen a ngai tawh thung - Cherries hi nizan khan Southampton nen an inkhel a, an result kan hre hman lo. 

Championship-a nomawi chawi chungin Norwich-in Premier League an khel a, season khat chauh hun an hmang hman tihin division hniam lama tla chiang hmasa ber an ni. Mahse, Norwich-in an game hnuhnung chu an mualphona tur khuh nan an hmang thei lo a, Burnley lakah first half chhungin Buendia leh Drmic ten red card an hmu! 

Buendia hi Ashley Westwood-a nghawk avangin minute 35-naah hnawhchhuah a ni a, Drmic hi Erik Pieters laka a foul avangin first half hun pek belhah hnawhchhuah a ni bawk - a tawpah 2-0 in an tlawm zui. Burnley tan Chris Wood chuan goal hmasa zawk hi first half hun pek belhah a khung a, Burnley tana Premier League season khata goal 13 khung thei hmasa ber record a siam - minute 80-naah Ben Godfrey chuan an lamah a ti lut ve leh bawk a, Burnley an chak. 

Norwich boss Daniel Farke chuan, "Kan chet dan a professional tawk lo a, tawnhriat kan nei tlem tih a hriat a, attthlak takin kan che a ni," a ti a, an khingpui Burnley tawnhriat ngah zawkna an ngam loh thu a sawi.