MFA hnuaiah district thar pathum a piang

Mizoram Football Association chuan July 18, Inrinni khan district pathum Hnahthial District FA, Khawzawl District FA leh Saitual District FA an hawng a, tihian MFA hnuaia district awm sa pariat nen 11 an ni ta chiah. 

MFA hnuaia District 11 te chu Aizawl DFA, Lunglei DFA, Siaha DFA, Champhai DFA, Kolasib DFA, Serchhip DFA, Lawngtlai DFA, Mamit DFA, Hnahthial DFA, Khawzawl DFA leh Saitual DFA te an ni. Hnahthial DFA hi MFA finance secretary Lalruatsanga Tochhawng-in a hawng a, Hnathial tlangval pahnih India international footballer Jeje Lalpekhlua leh Isaac Vanmalsawma ten an telpui. 

Khawzawl DFA hi MFA patron Lalnunmawia'n a hawng a, Khawzawl District aṭanga player langsar Robert Lalthlamuana leh R. Laldanmawia te an tel. Saitual District hi MFA honorary secretary Lalnghinglova Hmar-in a hawng a, Mizoram football thuneitu MFA hian district thar pathumte hi Rs 20,000 leh football thar pangain a indan a ni. District thar pathumah hian hruaitu thar (Adhoc) ruat nghal a ni a, hruaitu thar thlan hi nakkuma District hruaitute inthlan rualin neih a ni ang.