Man United-a Ronaldo dinhmun a chiang lo

Manchester United chuan tun nipui bazarah Cristiano Ronaldo chu chhuahtir thei dinhmunah an ding. Portugal captain hi a hlim loh avangin team boruak a tichhiaah ngaih a ni a, hemi a nih avang hian Ronaldo dinhmun hi a chiang lo.

Ronaldo a hlim lo

Cristiano Ronaldo hi kum khat liam taah khan Juventus aṭangin Old Trafford-ah a kir a, bul a ṭan ṭhat nghal avangin thawm pawh a nei ring hle. Kum 37 mi Ronaldo hian inelna hrang hrangah goal 24 khungin club top scorer ni mah se parukna nichungin season an khar.

Man United-in tun season-ah Champions League an khel pha lo a, Europa League chauh an khelh dawn avangin UCL-a record nei ṭha Ronaldo-a'n chhuah a duh.

Ballon d'Or vawi nga dawng tawhtu Ronaldo hian kum hnih daih contract a ziak a, kum khat pawhsei dan a la awm. Portuguese forward hian kum khat contract la nei mah se football chanchina sulhnu ṭha zawk a hnutchhhiah theih nan chhuah a duh niin a lang.

Man United-in pre season tour an neihnaah pawh Ronaldo hi a tel lo a, Premier League match hmasa berah pawh 100% fitness neih loh vangin Erik ten Hag-a'n bench-ah a dah. Brentford lakah erawh Ronaldo-a'n bul a ṭan a, 4-0 a an mualpho ṭumah a khel tluan.

Season ṭan hmaa chhuah duh Ronaldo hi season ṭan hnuah pawh a hlim chuang lo a, an result a ṭhat miau loh avangin ṭha ber nih duha tuihal Portuguese striker hlim lo hi a mak hran lo.

United an inngaihtuah
Ronaldo hian khelmual chhung leh pawnah a hlim lo tih a lantir. Khawthlang media te chuan club canteen-ah pawh amah chauhin hun engemaw tichhung chu a ei tawh niin an ziak.

Training-naah pawh Ronaldo hian a chetzia hmangin a lawm lo tih a lantir niin sawi a awm tel a, Erik ten Hag-a'n high pressing game a khelh pawh a thlawp lo niin an sawi tel bawk.

Erik ten Hag-a'n mipui hmaah chuan Ronaldo an zawrh loh thu a sawi a, thuthang thar berah erawh United hotu lamin hralh a ṭha zawkah a ngai tih a awm. Ronaldo hi a chhuah phawt loh chuan tuna club chhung boruak ṭha lo hi siam ṭhat mai theih lohah an ngai a, chuvangin Portuguese striker chhuah dan kawng an zawng niin sawi a awm bawk.

Manager Ten Hag, chief executive Richard Arnold leh football director John Murtough tan thutlukna pawimawh siam turin thla chanve pawh a awm tling ta lo. Man United hian Ronaldo hi chhuah phal pawh ni se duhtu an awm ang em, tih hi zawhna a tling.

Thla liam ta khan Chelsea nen sawizawm ni mah se Thomas Tuchel-a'n an lak loh tur thu a tichiang. Club lian dang Bayern Munich leh Atletico Madrid te nen pawh an sawizawm a, amaherawhchu club supporter lamin lak loh an duh zawk. Training-na hmunah Atletico ṭantuten 'CR7 not welcome' tih banner an tar a, Ronaldo hi a hlawh a tam bawk avangin awlsam taka chhuahtir theih a ni dawn lo.

Engtin zel?
Manchester United hian match hmasa pahnihah Brighton (1-2) leh Brentford (0-4) te an hneh loh avangin point an la hmu lo a, table mawngphahah awm mekin August 22, Thawhṭanni zanah anmahni ang bawka chak la nei lo Liverpool an hmachhawn dawn.

Erik ten Hag-a hoten goal khat nei tawh mah se United player zingah goal khung an la awm lo a, goal ruk ngawt an chhhuah tawh bawk avangin tlarhma leh tlarhnung tih chak dan an ngaihtuah mek. Dutch manager-in player ṭha zawk a mamawh thu a sawi a, nipui transfer-ah player pahnih tal chu an lakluh a rinawm a, pathum pawh an la la thei bawk.

Transfer bazar lamah chuan Man United nena sawizawm player an pung ta hle. Old Trafford pan hnai bera sawi chu Adrien Rabiot a ni a, French midfielder bakah hian Atletico Madrid forward Matheus Cunha, Lyon forward Moussa Dembele, Leicester forward Jamie Vardy leh Ajax winger Anthony te nen sawi zawm an la ni. Nipui transfer tirh aṭanga United nena sawizawm Frenkie de Jong-a hming pawh a la ri ve reng a, a tak ram a thleng ang em, tih chu hunin a hril ang.