Commonwealth Games medal hi Mizote tan a ni - Remsiami
India tana Commonwealth Games 2022 bronze medal latu Lalremsiami Hmar chu nimin khan Mizoramah a lo haw - Mizo nula hi Lengpuiah mi ṭhahnem takin an lo hmuak.
Mizo nula Remsiami chuan, “India hmeichhe hockey team ten kum 16 hnua a vawi khat nan Commonwealth Games medal kan la leh a, medal la thei zinga ka tel hi ka lawm. Mizo mipuite min thlawpna leh min ṭawngṭai puina vang a ni a, chuvangin medal hi kan zavaia ta a ni.
“Commonwealth Games-ah kei leh Jeremy Lalrinnunga ten medal kan la a, hei hi a bul ṭanna chauh a la ni. Keini pahnih pawhin kan tih theih chuan Mizo ṭhalai tam takte hian medal lian leh sang zawk an la thei tih ka hria,” a ti a, hmasawn tur chuan hmunhma neih ṭhat a pawimawh thu a sawi bawk.
Remsiami telna India hmeichhe hockey team-in Commonwealth Games-ah khan semifinal an thleng a, mahse Netherlands an ngam lo. Bronze medal inchuhna inkhelah New Zealand nen 1-1 in an inhnehtawk a, penalty shootout-ah India hi 2-1 in an chak.
Tokyo Olympic-ah pawh khan Remsiami hi a lo feh chhuak tawh, medal la ohak chiah lo mah se khawvel huap infiamna khawpui lianah hian palina dinhmun an lo luah tawh bawk a ni.
A thlen chin aṭanga hmasawn a tum thu sawiin Siami chuan, “Gold medal lak kha kan tum ber a ni a, mahse bronze medal ah kan lungawi a ṭul. A lehpekah chuan gold medal lak tawh ngei kan tum ang,” a ti.
A pa an hre reng
Remsiami nu Lalzarmawii (Zari) chuan, “A tirah kha chuan Siami'n hlawhtlinna a chan hian a pa nen, kan chhungkuain kan hmuak ṭhin. Tunah erawh a pa a boral tawh a, a tel loa a hlawhtlinna chan ka lo hmuak hi a lunglen thlak ka ti hle.
“Motor chuan te hi harsa ka ti ṭhin si a, mahse ka hmuah ngei a ngai si. Kan fanu hlawhtlinna hi Mizote tan a ni a, min duhsaktute zawng zawng chungah lawmthu ka sawi,” tiin a fanu chungchang Vanglaini a hrilh.
Kum 2019 June 21 khan India tan Remsiami hi Japan-ah a feh chhuak a, tournament an khelh laiin a pa Lalthansanga chu an khua Kolasibah a boral, inelna a hmachhawm chhunzawm tho a, he tah hian goal pawimawh khungin India chu hlawhtlinna a chanpui.
Lawmthu
Hockey Mizoram president Zothankimi chuan, “Kan lawm tak meuh meuh, tun Commonwealths Games-ah khan Remsiami inkhelh thiamzia a lang chiang. India tan player pawimawh a nih zia a lang chiang a, Hockey Mizoram chuan an chhuang tak meuh meuh,” tiin a sawi.
Siami hi Thenzawl Hockey Training Centre atanga zir chhuak a ni a, heta ṭang hian India tan koh a ni. Chief coach chawl ta (SYS) Lalrampari chuan, “Tournament a khelh tawh zawng zawngah chuan Siami khelh that ber tum a niin ka hria. Kan player hi kan chhuang a, nakinah chuan India captain pawh a la nih theih hial ka ring,” tiin Vanglaini a hrilh.
Mizo zingah India hockey team tan - Siammawii, Lalruatfeli Hnialum, Lalrothuami (Btei), Lalhlunmawii, Rosalind Lalchhanhimi Ralte, Ramngaihzuali, Lalremruati, Lalrindiki, Marina Lalrammghaki, Ramngaihzuali leh Lalremsiami Hmar te an inlan tawh a ni.