Nunez OUT; Liverpool OUT?

Pound maktaduai 64 man Darwin Nunez-a'n Liverpool tana Anfield-a a match hmasa berah red card a hmu a, Uruguayan striker hi insum zawh loh avangin hnawhchhuah a ni.

Nunez hnawhchhuah a nih hian Liverpool-in Crystal Palace lakah si khat an phur mek a, Luis Diaz chuan an si phurh hi a hnuah sut mah se goal dang an khung loh avangin Palace nen 1-1 in an inhnehtawk.

Premier League champion tura Manchester City nen inel ber tura ngaih Liverpool hian an league match hmasa pahnihah hnehna an la chang lo a, point hnih chiah an la hmu.

Hetihlai hian Pep Guardiola enkawl City erawh point ruk nen an vawk lal len a, City chetsual khatzia ngaihtuahin Reds tan la hma viau mah se champion beiseina a tawp ta mai em? tih chu zawhna awm thei, Liverpool fans tana chhan ngam harsa tak a ni ta.

Palace an chiang
Crystal Palace boss Patrick Vieira-a'n Anfield-ah Liverpool an hmachhawn dawn tih a hria a, Jurgen Klopp-a team hi âtthlak taka nawr a tum lo tih a player rem danah a tilang.

Tlarhnungah player panga ngawt a rem a, 5-4-1 formation hmangin counter-attack chu innghah nan a rawn hmang a, a bik takin centre back pahnih Marc Guehi leh Joachim Andersen an khel ṭha takzet.

Liverpool hian rin lawk ang ngeiin na takin an nawr nghal a, an vanneih zan ni se goal pawh hma taka khung thei tur an ni - Trent Alexander-Arnold-a ball cross ṭha tak chu Nunez tan khung awlsam niin lang mah se, kum 23 mi striker hian holam takin a hlah.

Reds tan mangan laia chhanchhuaktu ni ṭhin Salah-a'n chance duhawm a nei ve leh a, mahse, Egyptian forward pawh hian Arnold-a siamsak tho chu goal hrulah bak a pet thei lo.

Barakhaih!
Liverpool-in an chance neih an chhawr thei lo a, Palace erawhin hun ṭha an nei fo dawn lo tih inhriain an chance neih an khawhral duh lo.

Counter attack aṭanga a ball hmuh chu Palace attacking midfielder Eberechi Eze chuan Zaha tan ṭha zetin a thlawh lut a, Virgil van Dijk leh Nat Phillips ven aṭanga tal putin Zaha hian class zetin goal hmahruai a khung.

Anfield-ah Liverpool fans an ngawi ṭhuap a, tlarhnung rem phu ṭha tak Palace laka goal khung harsat turzia an hai lo. Reds hian chance erawh an insiam zui ve leh mai a, mahse, Harvey Elliott hnen aṭanga a ball hmuh chu Nunez-a'n goal-ah a la chantir thei lo cheu.

Nunez a thawkrim a, goal khung châkin a tuihal. Mahse, kum 23 mi striker a ṭang ulh hret a, Palace defender Andersen-a'n a hnunga a nam chu hrethiam loin a luin a tauh let a, uar taka Andersen a tluk bawk avangin referee Paul Tierney tan minute 57-naa red card phawrh mai lo chu duhthlan tur dang a awm chuang lo.

Mamawh chhanna
Liverpool-in Anfield-ah si an phur a, Kop hoin an stadium ngeia a goal khung lai hmuh an châk em em, Reds tana a competitive match hmasa pahniha goal khungtu Nunez hnawhchhuah a ni bawk.

Klopp-a naute tan beisei a tlem a, 'comeback' beisei a harsa. Mahse, Nunez hnawhchhuah aṭanga minute lina lekah Luis Diaz a inlar a, Colombian forward hian duhthala Palace defender rual a bum hnuah, penalty box pawn aṭangin mawi zetin a khung.

Mahse, Reds ṭantute beisei angin thil a thleng zui lo - Mo Salah leh substitute Fabio Carvalho ten uiawm takin chance an hlah leh a, Liverpool-in draw result bak hlawhchhuah tur an nei lo.

Merseyside club hian 73% zet ball chang chungin vawi 24 shot an nei a, heng zinga vawi li chiah hi target-ah a kal a, a tawpah chuan Palace-in an duh an hlawh chhuak a, Liverpool erawhin lunghnur zetin khelmual an chhuahsan.

Squad a pan
Season an ṭan chauh a, mahse, a zawna vawi hnih an chak zawh loh miau avangin tam takin Liverpool chungah beiseina an nei tlem ṭan a, a awm lo hran lo.

Klopp-a'n chhuanlam tur a zawng a nih erawh chuan chhuanlam tur a tam - Liverpool hian hliam vangin Joel Matip leh Ibrahima Konaté an chhawr thei lo a, season hmasa lawka loan-a Bournemouth-a an khelhtir Nat Phillips chu tlarhnung laiah an chhawr a ngaih phah.

Midfield-ah Thiago Alcântara a inhliam a, Fabinho, Elliott leh kum 37 mi James Milner an inkawp a ṭul a, Roberto Firmino leh Diogo Jota an inhliam avangin goal khung an harsat laia luhtir tur an nei lo bawk.

Liverpool elpui hi City an ni a, team pahnih squad en ila, a la inchhah hleih deuh tihah hian phat tur a awm lo a, Liverpool tan Pep-a leh a naute mut titui lo tur chuan insiamṭhat ran a ṭul takzet.

Nunez, i dawn chiang lo!
Nipui transfer-a Sadio Mane chântu Liverpool fan-ten Nunez an neih avangin an thlaphang lo a, mahse, an beiseina kengtu striker hian thinrim 'in control' dan zir a mamawh tih a lang.

Klopp chuan, "Darwin khan a ṭhiante tan harsatna a thlen tih a inhria a, zanin chu hahdam phawt se, naktukah ka titipui ang. Andersen-a'n a chhaih buai avanga khatianga che kha a ni a, mahse, khatianga chet tur a ni lo a, red card dik tak a ni.

"Centre back-te chuan khatiang khan an tibuai ang tih a inhre sa a, khatiang khan a che let tur a ni lo. Mahse, hrem a nihna hi hlawk thlak taka hman kan tum a, hrem loin a taksa tichak lehzual turin kan pui dawn a ni," a ti a, a striker chet dan thup mawi a tum lo.

Liverpool hian August 22, zan dar 12:30-ah chak la nei lo Manchester United an lenchilh dawn a, he inkhel bakah hian Bournemouth (August 27) leh Newcastle United (August 31) a an hmachhawn hunah Nunez hi a chet dan avangin a inlan thei lo ang - Premier League danah tharum hmanga chet (violent conduct) hi match thum hrem an ni ṭhin.