Morata a la chul lo e!

Alvaro Morata chuan Atletico Madrid a kir leh hnuah a la chul lo tih a pholang a, season thara an league match hmasa berah goal hnih a khung nghal.

Atletico Madrid hian an mikhualna ramah Getafe chu 3-0 in an sawp a, Morata-a'n goal hnih a khung bakah Antoine Griezmann chuan goal khat a khung ve bawk - goal thum hi Joao Felix siamsak vek a ni.

Kum 29 mi Morata hian January 2019 khan Atletico hi thla 18 chhung atan Chelsea aṭangin loan-in a zawm a, July 2019-ah Atletico hian pound maktaduai 58-a Spanish striker hi an lak ngheh tur thu an puang.

Atletico-ah season khat leh a chanve chhungin match 61 a khel a, goal 22 a khung. Mahse, September 2020 khan a club hlui Juventus-ah loan bawkin a kir a, Juve hian loan-a hawh manah euro maktaduai 10 an pe a, season khat dang loan-a an hawh duh chuan €10mtd pek belhin an hawh leh thei bawk.

Juve hian Morata hi season hnih loan-in an hawh a, match 92-ah goal 32 a khungsak - Italian club-in €35mtd-a a ngheta lakluh theihna dan nei mah se a nghetin an lalut duh lo a, Atletico lamah a kir.

Atletico hian an striker hi chhuahtir an duh nia sawi thawm a awm a, Manchester United hming pawh lam rik a ni. Mahse, Madrid khaw club tana a match hmasa berah goal hnih a khung nghal a, Atletico boss Diego Simeone-a'n chhuahtir a phal tawh kher lo mai thei.

Morata chuan, "Atletico tana khelh hi a nuam ka ti a, khelmuala theihtawp chhuah zel turin he hmunah hian ka awm a ni," a ti a, chhuah lam a sawi lo.

Goal khat dang khungtu Griezmann hi Barcelona aṭanga Atletico-in season hmasa ṭan dawna loan-a an hawh a ni a, French forward hi season khat atana loan-a an hawh bakah kum khat dang a loan hun hi pawhsei theih a ni - kum 31 mi Griezmann-a'n goal a khung khan ni 221 hnua goal a khung lehna hmasa ber a ni!

La Liga inkhel dangah Athletic Bilbao leh Real Mallorca chu goal khung loin an inhnehtawk a, season hmasaa pangana Real Betis chuan 3-0 in player 10-a khel Elche chu 3-0 in an hneh ve bawk.

Betis tan Juanmi chuan goal hnih khungin, Borja Iglesias chuan goal khat a khung a, Elche defensive midfielder John Nwankwo chu minute 16-na lekah hnawhchhuah a ni thung.

August 12, Zirtawpni Zan
Osasuna 2 - 1 Sevilla
OSA: Ezequiel Ávila 9'; Aimar Oroz 74' (P)
SEV: Rafa Mir 11'

August 13, Inrinni Zan
Celta Vigo 2 - 2 Espanyol
CEL: Iago Aspas 45+2'; Gonçalo Paciência 63'
ESP: Edu Expósito 72' ; Joselu 90+8' (P)
Real Valladolid 0 - 3 Villarreal
VIL: Nicolas Jackson 49'; Álex Baena 81', 90'
Barcelona 0 - 0 Rayo Vallecano

August 14, Pathianni Zan
Cadiz 0 - 1 Real Sociedad
RES: Takefusa Kubo 24'
Valencia 1 - 0 Girona
VAL: Carlos Soler 45+1' (P)
Almeria 1 - 2 Real Madrid
ALM: Largie Ramazani 6'
REM: Lucas Vázquez 61'; David Alaba 75'

August 15, Thawhṭanni Zan
Athletic Bilbao 0 - 0 Real Mallorca
Getafe 0 - 3 Atletico Madrid
ATM: Álvaro Morata 15', 59; Antoine Griezmann 75'
Real Betis 3 - 0 Elche
REA: Borja Iglesias 28'; Juanmi 39', 60'