Chappell-a'n commentator hna chawlhsan

Australia cricketer hlui Ian Chappel chuan kum 45 hnuah commentator hna a chawlhsan a, cricket ngainatute tan chuan chânna nasa tak a ni ang.

Chappel hi kum 78 mi a ni tawh a, a hriselna a pan ve bawk avangin a thutlukna hi a pawmawm hle. Australia cricket team captain hlui chuan, "Commentary chungchanga ka hmalam hun hi ka ngaihtuah tawh ṭhin. Stroke tenau te ka nei a, vannei takin ka ṭha chhuak. Mahse, kum a upat zel avangin zin ka harsat a, step-a kal te hi ka harsat a, thildang pawh harsatna ka tawk chho zel," tiin a chawlh chhan a sawi.

A inkhelh hunlaiin Chappell hian Test match-ah 5345 runs a siam a, chawhrualin 42.2 runs siam phain match 30-ah Australia tan a captain bawk. ODI-ah pawh match 16 a khel a, kum 1980 a inkhelh a chawlhsan zawhah commentator hna chelhin a hlawhtling hle.

Cricket pundit zinga hriat hlawh Harsha Bhogle chuan, "Engmah hi a sawi uchuak lo a, a nihna angin a sawi mai. A professional em em a, a nungchang hi ka entawn nasa a ni. Mi ropui Chappell-a'n chawlh a hun thu a puang a, ka thawhpui ve thei kha ka lawm a ni," tiin a thlah ve bawk.