Forest-in player an lei leh ta!

West Ham laka hnehna chang hlim Nottingham Forest an la bazar zo hleithei lo a, nipui transfer-a an player lakluh 15-na ni turin midfielder Remo Freuler chu Atalanta aṭangin an lalut.

Switzerland tana vawi 46 inlan thei Freuler-a man zat hi tarlan ni lo mah se khawthlang media-te chuan pound maktaduai 7.6 bawr vel niin an tarlang a, a khelh ṭhat dan a zirin a man hi la pek belh leh theih tur a ni.

Kum 30 mi Freuler hian season ruk leh a chanve zet chu Serie A club ṭha Atalanta tan a khel tawh a, hetih chhung hian match 259-ah inlansakin goal 20 a khung a, assist vawi 23 a nei bawk - Forest-ah hian June 2025 thleng khel turin contract a ziak.

Forest hian Inrinni khan Watford striker Emmanuel Dennis an lalut a, a man zat hi official taka puan ni lo mah se £20mtd man nia sawi a ni - £17mtd. man striker Taiwo Awoniyi khumin, Forest player man to ber a ni.

Kum 24 mi Dennis hian season hmasa khan Watford tan match 35 khelin goal 10 a khung a, assist vawi ruk a nei bawk. Mahse, Premier League aṭangin an tla thla a, a puanthuah telin Forest lam a pan ta a ni. Nigeria international Dennis hian kum li cham turin contract a ziak niin an sawi.

Hetihlai hian Crystal Palace midfielder hlui Cheikhou Kouyate chuan free transfer-in Forest hi a zawm bawk a, kum 32 mi Kouyate hian July khan Selhurst Park-ah a contract hmang zoin, Forest hi kum hnih atan a zawm ta a ni.

Kouyaté hian season hmasa pawh khan Palace tan inelna hrang hrangah match 31 a la khel a, goal khat khungin assist vawi khat a nei a, season li a cham chhunga match 141 khelin goal thum a khung a, assist vawi nga a nei bawk.

Senegal tana vawi 82 inlan thei midfielder hian West Ham tan season li zet a lo khel tawh a, Premier League-ah a mikhual loh avangin Forest tan chuan a tawnhriat ringawt pawh hi a ṭangkai khawp ang.