Man City-in Gomez an lalut

Manchester City chuan nimin khan Spain Under-21 defender Sergio Gomez chu Anderlecht aṭanga an lakluh thu an puang. Kum 21 mi Gomez hian kum li daih contract a ziak a, a man hi euro maktaduai 13 (£11m) niin a chet ṭhat dan a zirin a la pung thei bawk.

Gomez hi Barcelona academy chhuak a ni a, Borussia Dortmund-ah kalin German club tan beisei a phak loh avangin kum 2021 khan Anderlecht a pan. Belgian club-ah hian City captain hlui Vincent Kompany enkawlna hnuaiah khelin match 40-ah a inlan a, goal ruk a khung hial.

Man City defender thar Gomez chuan, "Manchester City-in hun ṭha min pe hi ka lawm a, ka theihna zawng zawng ka chhuah ang," tiin a sawi a, amah enkawltu Kompany chu a fak bawk.

Gomez hian Spain U17 chu Euro U17-ah a champion pui tawh a, FIFA U17 World Cup-ah pahnihna nihpuiin silver ball a dawng a, a sulhnu thlirin theihna sang tak a nei tih a hriat theih a ni.