Juve tan Di Maria a vul nghal

Player lak thar zingah Paul Pogba chu hliam vangin a inlan thei rih lo a, mahse amah ang bawka lak thar Angel Di Maria erawhin Juventus tan duhthusama ṭhain season bul a ṭan nghal.

Thawhṭanni zan khan Old Lady hian tun season Serie A-a an match hmasa ber an khel ve chauh a, an mikhual Sassuolo chu 3-0 in an hneh.

Massimiliano Allegri nauten nikuma bul an ṭan fuh lohna ang kha an pumpelh dawn niin a lang.

Allianz Stadium-a inkhelah Di Maria hian minute 26-naah goal hmahruai a khung a, nikuma an striker lei thar Dusan Vlahovic-a'n chawlhlawk hmain penalty a khung belh bakah, second half-ah an goal thumna a khung bawk.

Paris Saint-Germain tana contract hmang zo, a thlawna Juve zawmtu Di Maria hian a khel ṭha nghal. Mahse, minute 66-naah hliam vanga lak chhuah a ngai a, eng ang taka na nge a nih erawh hriat a la ni lo.

Bianconeri manager Allegri chuan, "A malpui vei lam tihrawl a na, a hma pawhin hliam tenau hi chu a lo nei tawh. Endikna ṭha zawk neih a nih hunah a chiang ang," a ti a, a player chu na tuar hmel a put reng thu fiamthuin a sawi bawk.

Italian club ṭha hi hliam vangin an la buai rih viau. Pogba chauh a ni lo, goalkeeper Wojciech Szczesny, Federico Chiesa leh Kaio Jorge te pawh hliam vangin an la chawl, hrem vangin Moise Kean leh Adrien Rabiot te an inlan thei lo thung.

Inkhel dangah Napoli chuan Hellas Verona 5-2 in an hneh ve bawk a, an player thar Khvicha Kvaratskhelia chuan goal a khung bakah assist a nei nghal bawk a, a tan pawh bul ṭanna ṭha tak a ni.

Season hmasa khan Napoli hian pathumna ni chungin season an khar. Mahse, nipui bazarah captain Lorenzo Insigne, club tana goal khung hnem ber Dries Mertens leh defender Kalidou Koulibaly te an chhuak.

An player tawnhriat nei ṭha an chhuah hnem avangin Serie A champion tura rinkai zingah an tel meuh lo. Mahse, an league match hmasa ber an khelh dan aṭanga chhut chuan club lian dang tan ngaihthah theih an ni lo ang.