Thlak a nih vangin Ibra a lungawi lo

Inrinni zan Serie A inkhelah AC Milan chuan an mikhual Bologna chu 5-1 in an sawp a, goal li an khung tawh hnuah Zlatan Ibrahimovic chu thlak niin khelmual a chhuahsan dawnah a lungawi lohzia a tilang.

San Siro-ah Milan tan Alexis Saelemaekers, Hakan Calhanoglu, Ismael Bennacer, Ante Rebic leh Davide Calabria ten goal khat ṭheuh an khung; season kal laia an chak chian ber ṭum an tawng. Mikhual goal neih chhun hi defender Takehiro Tomiyasu khung a ni.

Ibra hi kum 38 mi a ni tawh a, inkhel zawng zawngah minute 90 inlan turin a tlin tawh kher lo ang tih chu a chiang. Tun hnaia match li an khelh zinga pathumah chuan minute 60 bawrah thlak ṭhin a ni a, thlak a nih vangin Ibra a lawm lo.

Milan manager Stefano Pioli chuan, "Thlak a duh lo hi chu thil pangngai a ni a, ani hi chuan khelmual chhungah a tam thei ang ber hun hman a duh. Team tana mi pawimawh a ni a, chuvangin a tha kan khek a ngai ve bawk. "Season thara European football khel phak china awm ngei kan duh, chumi tur chuan kan ṭhat theih dan turin thutlukna ka siam a ngai," a ti. Milan hi parukna an ni mek, manager Pioli hian tun season bak chu a team hi a enkawl zui dawn lo thung.

Beisei phak baka season hmang ṭha Atalanta an chak zo lo, an mikhualna ramah Verona nen 1-1 in an inhnehtawk - point 71 an hmuh tawh avangin pathumna dinhmun erawh an la luah phak chhunzawm zel.

Serie A goal khung hnem ber ni lai Atalanta lamin Duvan Zapata hmangin goal hmahruai an khung a, an hlim chhung erawh a rei lo. Goal an chhuah aṭanga minute 10 a liam hmain Verona lamin Matteo Pessina hmangin an sut a, point khat ve ve in an insem.

Atalanta manager Gian Piero Gasperini chuan, "Match ṭhenkhatah chuan point khat chauh hmu chung pawha kan lungawi a ṭul ṭhin, chutiang hun chu tun ṭumah hian kan tawng," a ti. Italian manager hian a naute hi Serie A pathumna a nih pui mek bakah Champions League quarterfinal a hruai thleng tawh.