A thiam pali zingah Konta
Wimbledon hmeichhe singles semifinal khel tur a hriat kim ta. Venus Williams, Garbine Muguruza leh Magdalena Rybarikova te zingah Johanna Konta hming a lang. Kum 1978 hnu lamah Konta hi khawtual nula Wimbledon semifinal khel leh thei tur hmasa ber a ni!
Vawiin tlai dar 4:00 hian final lut tur zawnna neih tur a ni a, Konta leh Venus an inhmachhawn dawn a, inkhel pakhat zawkah Muguruza hmaah seeded chang phak lo Rybarikova a ding bawk ang.
Konta a vannei
Thawhlehni zan Centre Court-a inkhelah seeded parukna Konta chuan set hmasa ber a hloh zet hnuah world number 2 Simona Halep chu 6-7 (2-7), 7-6 (7-5), 6-4 in a lehthal a, a vawi khat nana Wimbledon semifinal lut tur hian darkar hnih leh minute 28 a mamawh.
Kum 1977 khan British nula Virginia Wade-i'n Wimbledon nomawi a chawi a, he mi hnuah khawtual nula nomawi chawi thei an la awm leh lo. Konta hian record duhawm lo tak hun rei tak chhung an neih tawh thai bo turin match hnih bak chak a mamawh tawh lo - vawi nga champion tawh Venus lakah fiahna hautak a hmachhawn dawn a ni.
Romanian nula Halep-i'n Angelique Kerber lehpelin world number 1 nih theihna hun ṭha a nei a, mahse semifinal a thlen zawh tak loh avangin a sang berah a awm thei rih dawn lo. Kar leha ranking chhuak tharah chuan Czech Republic nula Karolina Pliskova-i chu number 1 thar a ni ang.
Venus Vawi 100
Grand Slam vawi sarih champion tawh Venus Williams chuan French Open champion Jelena Ostapenko hnehin semifinal a lut a, Wimbledon-ah hian singles match bikah vawi 100 hnehna a channa chiah a ni! Kum 37 mi Venus hian darkar khat leh minute 13 chhungin Latvian nula zinga major title la hmasa bera Ostapenko lakah hian 6-3, 7-5 in hnehna a chang.
American star hian hliam a neih fo avangin kum 2011 vel khan court chhungah a hmel a lan mumal thei lo a, world ranking-ah pawh 103-naah a tla hniam hial. Tun hnaiah hma rawn sawn lehin Australian Open-ah khan final a thleng a, a nau Serena Williams a ngam lo.
World number 11 Venus chuan, "Ostapenko khan service a nei ṭha a, chhuhsak a har takzet. A kum a la naupangin hmabak êng tak a neiin ka hria. Ka khelh ṭhat ber ṭum a ni lo nachungin tawnhriat ka ngah tawh avangin ka chiai duh lo a, a tawpah a vannei zawkah ka ṭan phah," tiin a sawi.
Spain nula
Kum 1994 khan Conchita Martinez-i'n Wimbledon nomawi a chawi a, Spain nula zingah ani chiah hi he hmuna champion thei a la awm. Tunah chuan Martinez hi coach a ni tawh a, a kaihhruaina hnuaiah Muguruza-i'n a sulhnu zui turin beiseina a nei mek.
Court One-a inkhelah season hmasa French Open champion Muguruza hian darkar khat leh minute 15 chhungin Svetlana Kuznetsova chu 6-3, 6-4 in a hneh. Spain nula hian Rybarikova a hmachhawn zui leh dawn a ni. Inkhel pakhat zawkah world number 87 Rybarikova hian Coco Vandeweghe chu 6-3, 6-3 in a hneh ve bawk.
Kum 23 mi Muguruza chuan, "Wimbledon quarterfinal hi tun hmain ka khel tawh, a harsat zia ka hre chiang. Tun
ṭuma ka khingpui kha player ṭha berte zinga mi a ni bawk, hetih hunah tak hian rilru huaisen leh paukhauh neih a ngai ṭhin," a ti. Muguruza hian kum 2015 khan Wimbledon final a khel a, Serena Williams lakah a chak lo zawkah a ṭang.