Lacazette a inkhel dawn

Arsenal chuan vawiin tlai dar 3:30 hian Sydney FC chu friendly match an khelhpui dawn a, Arsene Wenger-a'n an club player manto ber Alexandre Laca­zette chuan Gunners tana a match hmasa ber a khelh dawn thu a sawi chiang.

Gunners manager Wenger chuan, "Sydney-ah hian Lacazette a inkhel ang, match hnih kan khelh turah a inlan ve ve dawn a ni," tiin Lyon aṭanga an lak thar striker chungchang a sawi.

North London club hian Inrinniah Western Sydney Wanderers an hmachhawn leh dawn a, chumi hnuah Bayern Munich leh Chelsea hmachhawn turin China an pan leh ang. China-a match hnih an khelh zawh hnuah Emirates Cup an khel leh dawn a, anmahni inelna buatsaihah hian Benfica leh Sevilla te nen an inkhel thung dawn a ni.

Arsenal hian tun nipui transfer laia an lakluh hmasak zawk defender Sead Kolasinac pawh Australia-ah hian an hruai tel a, Bosnia international hian a club thar tan a match hmasa a khel tura ngaih a ni bawk.

Kum 67 mi Wenger chuan, "Kan club hian khelhdan phung bik kan nei a, player tin hian tihdan tur bik an neiin an hna ṭheuh an belin rang takin an che thei ṭhin. Kan player thar pahnihte pawh hian kan club khelh dan phung hi an zawm theih nghal ngei ka beisei," tiin a sawi.

Wenger hian player thar lakluh an la tum reng thu a sawi tel a, "Kan squad a chhah tawh viau, hetichung hian player erawh kan la melh reng. Min ti chak thei kan duh zawng mi chu kan la melh reng a ni," a ti. AS Monaco midfielder Thomas Lemar leh striker Kylian Mbappe te chu beiseina mai a nih rih thu a sawi tel bawk.