Mayweather ka knockout ang: McGregor

Conor McGregor chuan August 26-a Floyd Mayweather nen an inhmachhawn hunah American boxer hi knock out ngei a intiam. Khawvel ngaihven fighter pahnih hi a vawi khat nan Thawhlehni zan khan Los Angeles khawpuiah mipui hmuhah an inlar a, he news conference-ah hian fans pawh an pungkhawm hnem hle.

UFC lightweight champion McGregor chuan, "Zuanzang, tha­rum nei leh mi tawrawt hi Mayweather hian a la hmachhawn ngai lo," tiin a inhrosa a, American boxer chuan, "Mei khupin ring i chhuahsan ang tih ka tiam che a ni," tiin Irish fighter inhrosakna chu a chhanglet thung.

Weight division pangaa cham­pion thei Mayweather chuan a kum tam tawh mah se boxing ring chhung la rap ngai lo McGregor hnek tura a la ṭhat tawk thu a sawi a, kum 2016-a Nate Diaz laka tlawm Irish fighter hi chhaih zuiin, "Mr. Tap Out-a hian awlsam taka tlawm mai a awlsam em em a, flag var vai chungin i tlawmna thu ila tlangaupui ang," a ti.

McGregor hian fight a hma­chhawn hnuhnung berah dollar maktaduai thum a hlawh a, mak­taduai 100 tel hlawh ṭhin May­wea­ther chuan, "I insual hnuhnung berah pawh dollar maktaduai thum bak i hnek chhuak zo lo," tiin Irish fighter hi a nuihsawh!

Irish legend McGregor chuan, " A ke, a ruhrel leh a lu te takte hi en ula. Round linaah ka knock out nghal ang. Ka thusawi hi lo chhinchhiah rawh u," a ti a, "Kum naupang leh inringtawk, pa hlim tak ka ni a, he hun tawng tur hian ka thawkrim em em a ni," tiin a hun ṭha neih chu engmah lo maia chantir a tum lo.

Dublin khaw chhuak McGregor chuan boxing chuan dan hrang hrang ngah viau mah se a buai loh thu sawiin, "Gloves rih zawng a awm tur a ni tihte, Mexican siam glove a ni tur a ni lo tihte, dan tesep te te a awm a. Ka buai lo. Ka mamawh awmchhun chu gum shield a ni mai a, chu chu ka neih chuan ring chhungah min dah ula, ka inring nghal a ni mai," tiin Mayweather a cho hle.

Pound maktaduai 78.5 bawr vel ve ve hlawh tur anga sawi fighter pahnih hi Toronto, New York leh London-ah mipui hmuh theih turin an in pho chhuak leh ang.