United captain thar Carrick

Manchester United-in Michael Carrick chu season thar atana an captain a nih tur thu an puang a, English midfielder hian Wayne Rooney a thlak ang. Old Trafford-ah Rooney hi kum 13 chhung a cham hnuin a chawrchhuahna Everton lam a pan.

Kum 35 mi Carrick chuan, "Club ropui tak tana ka captain thei hi ka inchhuang a, ka tan chuan chawimawina sang tak a ni. Kum 25 mi ka nihin United hi ka pan a, tun hi ka season 12-na tur a ni. Hlawhtlinna tam tak chang chunga hetianga rei hi ka cham ang tih ka beisei pha bik lo," tiin a lawm thu a sawi.

Tottenham Hotspur aṭanga United zawmtu chuan, "Naupang zawkte kaihhruai thei dinhmuna ka ding hi ka lawm a, footballer angin he club hi ka zawm a, tunah chuan he club hi ka ngaina tawh a, fan ruh tak ka ni tawh. Captain ka nih avangin ka zia thlak ka tum lo a, vawi leh khata han au chiam chiam emaw ṭhiante an chet dan tur han hrilh chiam hi ka zia a ni lo," tiin tun hmaa United captain Gary Neville, Nemanja Vidic leh Rooney bakah captain lar John Terry leh Steven Gerrard te entawn a tum loh thu a sawi.

United hian Pathianni zing dar 7:30 hian pre season-a an match hmasa berah LA Galaxy an hmachhawn dawn. United manager Jose Mourinho chuan, "Match hmasa berah De Gea leh Pereira ten minute 45 ve ve an khel ang. Match hnihnaah Pereira leh Romero te a inlan thung ang. Match thumnaa Manchester City kan hmachhawn hunah erawh kum lama naupang ber Pereira a awl ang a, De Gea leh Romero ten minute 45 ve ve an khel ang," tiin goalkeeper pathum chhawr vek a tum thu a sawi.

Red Devisl hian LA Galaxy an hmachhawn zawh hian Real Salt Lake (18 July) leh Manchester City (21 July) te an khel dawn a, United hian United States-ah hian Spanish club lian pahnih Real Madrid (July 24) leh Barcelona (July 27) te an la khelhpui dawn. Hemi zawh hian Oslo-ah Valerenga an khelh pui leh ang a, season ṭan hmaa an match hnuhnung ber chu Sampdoria nen Dublin-ah an khel ang.

TOUR 2017 SQUAD: De Gea, Romero, J Pereira, Valencia, Darmian, Fosu-Mensah, Bailly, Blind, Jones, Smalling, Lindelof, Tuanzebe, Rojo, Shaw, Mitchell, Young, Carrick, Fellaini, Herrera, McTominay, Pogba, Lingard, Mkhitaryan, Mata, A Pereira, Martial, Rashford, Lukaku.