Dinthar FC-in hnehna an chang ; Round of 16 lutin Lammualah Sailam tlangvalte an lâm e!

Lalbiakliana Memorial MFA Super Cup first round khelh zawh a ni ta a, nimin khan Dinthar FC-in 1st Bn MAP Football Academy 4-0 a hnehin second round an lut. Mizoram Premier League club pariat zingah Chanmari FC chiahin last 32 an lut zo lo.

Sailami FC-in MFA Super Cup Round of 16 an lut a, tournament tingaihnawmtu an ni.

Bul ṭan ṭha Maimawms

Dinthar FC-in an match hmasa berah second division club 1st Bn MAP Football Academy lakah harsatna an tawk lo. Minute 28-na lekah Khawzawl tlangval Hmangaihtluanga'n Maimawms tana a khelh hmasakna berah goal a khung nghal a, second half-ah tawnhriat nei ṭha pahnih Malsawma Chhangte leh Samuel Laltlanthanga bakah striker thar Lalnunsanga (Talea) ten goal khat ṭheuh an khung belh.

RG Stadium-a inkhelah Dinthar FC 4-0 in an chak a, second round-ah Neihdawn FC 2-1 a hnehtu Chaltlang FC an hmachhawn ang. MPL hmasa ber champion Dinthar FC tan quarterfinal kalkawng a harsa dawn lo niin a lang a, amaherawhchu first division club Chaltlang FC hi vanduai theihna tur an ni.

Group H inkhel dangah Ramthar Veng FC-in minute 89-naa R. Malsawmkima goal hmangin Zamuang FC an hneh hram a, second round-ah Chite Veng GSA an hmachhawn ang.

Lammual

Nikum MFA Super Cup semfinalist Chawnpui FC-in second round-ah FC Armed Veng South 2-0 in an hneh a, Group B winner zawnnaah champion rinkai Chhinga Veng FC an khelhpui dawn.

Group C-ah Sailam FC-in Melriat FC hnehin a thiam 16 zingah an inhlangkai a, chhungkaw 150 vel lek awmna Sailam tan an thlen chin hi inchhuanna tham a tling. Quarterfinal lut turin Sailam hian Lungverh FC 2-1 a hnehtu Durtlang Leitan an hmachhawn ang.

Goal 175!

MFA Super Cup-ah match 37 khelh a ni tawh a, goal 175 a lut tawh. Match tina goal lut zat hi 4.73 a ni. Niminah erawh Lammual leh RG Stadium-ah match thum ve ve a awm chungin goal 17 chiah a lut a, Thawhlehnia goal lut zat goal 44 nen a inthlau hle.

Lammual lamah ni hnih chhung second round match ruk khelh a ni tawh a, goal 33 a lut tawh a. MFA Cup first round bikah match 31 aṭangin goal 142 lutin round hmasa berah hian hattrick siam thei player 10 an awm a, own goal panga a awm bawk.

Nimin Inkhel Results
Lammual
Group B - Second Round
Chawnpui FC 2 - 0 FC Armed Veng South
CHA : H. Lalzawmliana 64'; Lalhriatzuala 81'
Group C - Second Round
Melriat FC 0 - 2 Sailam FC
SAI : Zirhnehsanga 64'; Lalthianghlima 90 +3'
Durtlang Leitan FC 2 - 1 Lungverh FC
DUR : Lalnunhlua 29'; Alan Lalsawmzela 83';
LUN : Elkana Rosangzuala 82'
RG Stadium
Group H - First Round
Ramthar Veng FC 1 - 0 Zamuang FC
RAM : R. Malsawmkima 89'
Chaltlang FC 2 - 1 Neihdawn FC
CHA : Isak Vanlalruata 11'; Lalruatfela 74' (P)
NEI : V. Lallianmawia 20'
1st Bn MAP FA 0 - 4 Dinthar FC
DIN : Hmangaihtluanga 28'; Malsawma Chhangte 51' (P);
Samuel Laltlanthanga 71'; Lalnunsanga (Talea) 87'