Juve vs Lazio

Juventus leh an elpui Lazio ten Serie A match khelh hmabak panga ve ve an la nei a, zanin dar 1:15-a an intawn tur hi match pawimawh bera chhal ngam a ni. Italian champion tur zawnna tih pawhin a sawi theih.

Old Lady-in point ruk zeta hma an hruai fal tawh avangin an dinhmun a ṭha, zaninah an chak a nih chuan a zawna a vawi kua nan an champion ngei a rinawm; an chak lo a nih erawh chuan Lazio leh Inter Milan tan beisei tur a la awm ve ang.

Covid-19 vanga an chawlh hma khan team pahnih hi an inkhel tawk hle, an inthlauhna pawh point khat chauh a ni. Hripui len hnuah team pahnih an chesual fo a, khel ṭha tawk lo chunga chesual tlem zawk Juve an vannei rih.

League match bikah chuan season tir lama an intawn ṭumin Lazio hian 3-1 in hnehna an chang. Mahse, 1942-43 hnu lamah season khat chhungin league match vawi hnihah Juve hi an la hneh leh lo, sulhnu ṭha hnutchhiah turin zanina chak a pawimawh.

Lazio coach Simone Inzaghi chuan, "Coronavirus len hma khan thla 10 chhunga kan chak loh zat chu vawi hnih chauh a ni a, hri len hnuah erawh match sarih zinga paliah kan chak lo. Fixture a inhnaihchilh em em a, hliam kan ngah bawk a vangin a harsa," a ti.

Maurizio Sarri erawh a inringtawk hle, Juve manager chuan, "Hniam leh san lai a awm, a chet ṭhat reng theih loh. League chu season tluana inelna a nih avangin vawi khata chet fuh hluai ai chuan nghelnghet taka khelh theih a pawimawh.

"Khelh hmabakah hian point kua kan hmuh belh thei a nih chuan kan champion dawn, point kan mamawh hmuh belh turin Lazio hnen aṭangin hmuh nghal kan tum ang," tiin a sawi. Sarri-a naute hian Coppa Italia nomawi lak an tumna an hlawhchham tawh a, Serie A nomawi erawh chawi ngei an tum. Champions League-ah pawh Lyon mualah 1-0 a an tlawm avangin quarterfinal lut tur chuan hna hautak an paltlang a ngai tawh dawn.