Quarterfinal lut hmasa ber tur Bethlehem VT?
Lalbiakliana Memorial MFA Super Cup 2017-ah Bethlehem Vengthlang FC-in team pahnih Aizawl FC Academy U18 leh Durtlang FC an hneh tawh a, vawiin tlai dar 2:00-a FC Venghnuai an hneh chuan Mizoram Premier League club hi quarterfinal lut hmasa ber an ni ang.
Rajiv Gandhi Stadium-ah Aizawl FC an inlan dawn a, an khingpui tur hi FC Khatla an ni. I League champion hian hnehna an chang a nih chuan naktuka Mizoram Police leh Kolasib Ṭumpui GSA chak zawk nen pool final an khel dawn. Chanmari FC an tlak tawh bawk avangin MPL club zingah quarterfinal lut pha lo team pahnih tal an awm dawn thihna a ni.
Lammualah BVT fiahna
Bethlehem Vengthlang FC khelh dan hmangah coach Chawngthansanga kut hnu a lang ṭan a, match hnihnaah game awmze nei an khel ṭan. Amaherawhchu BVT-in 10-0 a an sawp Durtlang FC hi second division an ni a, vawiina an khingpui tur first division club FC Venghnuai erawh awlsam taka pal zut theih an ni lo ang.
Venghnuai coach Lalrindika chuan, "Round of 16 kan lut hi kan lawm tawk viau a ni. First division league thlir pawhin kan budget a sang lo a, MPL club hmachhawn thei dinhmuna kan ding hi ka lawm takzet. BVT hi inzir nan kan hmang dawn a, defensive game kan khel ang," tiin Vanglaini a hrilh.
Chhinga Veng Under 18 coach ni bawk Rindika'n an team theih chin a hre chiang a, hei tak hi BVT tana an harsatna tur a ni. BVT hian midfielder Lalmawizuala leh defender Laldinpuia-te inhliam vangin an chhawr thei dawn lo a, a êng zawnga thlir chuan player dang tan coach tihlawm theihna hun ṭha a ni.
Lammual inkhel dang pahnih erawh second round a ni a, Group D-ah MPL club an awm loh avangin club tinin beisei tur an nei vek ang.
Chawhma dar 10:00-ah Venghlui FC leh Piler FC an inkhel dawn a, chhun dar 12:00-ah Ramhlun FC leh Young Star Utd, ITI Veng-te an inkhel bawk ang. Aizawl DFA hnuaia first division club pahnih Venghlui FC leh Ramhlun FC te hi chak tura rinkai an ni - chak zo tak maw?
Group E a ngaihnawm
RG Stadium match hmasa berah Aizawl FC Academy leh MFA Grassroots te an inkhel dawn. Inelna ṭan hmain MFA Grassroots hi MFA Super Cup tan an la naupang mah mahah a ngaih theih a, amaherawhchu match hmasa berah New Serchhip FC an hneh. Vawiinah erawh kum lama upa zawk Aizawl FC Academy chu last 16 lut tura rin an ni.
MPL club Ramhlun North-in an match hmasa berah Republic Vengthlang 12-0 in an sawp a, Sunhluchhip hnehtu Durtlang club FC Ramthar lakah pawh chak ringawtah an lungawi dawn lo - inkhel thunun chunga chak an tum ang.
AFC tum châk Khatla
Playoff hmanga third division-a inpet kai hlim FC Khatla-in an match hmasa berah second division club Sihphir Venghlun an hneh a, Chanmari FC emaw Aizawl FC tum hun an nghahhlelh thu Facebook lamah an ziak lang nghal.
FC Khalta tan Aizawl FC hi an lian mah mah a ni thei a, amaherawhchu Mizoram chhung club ṭhahnem tak hian inelnaa pangngaia I League champion tum theihna hun ṭha an nei dawn lo. Vawiin tlai dar 3:00 hian eng result pawh thleng se FC Khatla hi club vannei tak an ni tawh tho a, chak tura rinkai erawh an ni lo.
Aizawl FC-in an match hmasa berah Chanmari FC hneh mah se beisei an pha lo a, game hmuhnawm an khel lo. Coach Rohmingthanga kaihhruai club tan FC Khatla hi tlarhma chher hriam theihna hun ṭha a ni.
Vawiin Inkhel Tur
Lammual
Group D - Second Round
10:00 AM Piler FC Vs Venghlui FC
12:00 PM Ramhlun FC Vs Young Star Utd, ITI
Group A - Pool Final
02:00 PM FC Venghnuai vs Bethlehem VT FC
Rajiv Gandhi Stadium
Group E - Second Round
11:00 AM Aizawl FC Academy Vs MFA Grassroots
01:00 PM Ramhlun North FC Vs FC Ramthar, Durtlang
Group F - Second Round
03:00 AM FC Khatla Vs Aizawl FC