Paris leh LA-in Olympic thleng mai thei
International Olympic Committee (IOC) chuan Paris leh Los Angeles te chu an inrem a nih chuan 2024 leh 2028 Olympic Games thleng thei dinhmuna an din thu an sawi - khawpui pahnih hian 2024 Olympic thlen tumin hma an la mek.
September 13 hian IOC chuan 2024 Olympic Games thleng tur a thlang fel dawn a, Budapest, Hamburg leh Rome te an inhnuhdawh takah chuan infiamna khawmpui lian thlen tuma inel lai chu Paris leh Los Angeles te chiah an ni.
IOC president Thomas Bach chuan khawpui pahnihte hian a thleng hnuhnung zawk nih an hreh loh chuan an tan kawng a inhawn ve ve thu a sawi a, LA tana hma latu pawl chairman Casey Wasserman pawhin "Kum 2024 chiah hi kan thil tum a ni lo,'' tiin a lo sawi tawh.
France khawpui Paris lam thung hi chuan kum 2024 Olympic Village buatsaih tura an inpeih thu an sawi tawh a, LA lam hian a hnuhnung zawk an nghak thei a nih chuan Paris hnuah Olympic an thleng zui ve tura ngaih a ni. Hetihlai hian thutlukna lian tham siam tur chuan Paris leh LA bakah IOC lam hi an inthurual vek a ngai ang.