Premier League club sum lakluh a pung
Deloitte-in tun hnaia an zirchianna an tihchhuahah Premier League club ten 2015-16 season-a sum an lakluh zat chu pound tluklehdingawn 3.6 a ni a, a hma season nena khaikhinin a punna zat hi 9% ngawt a ni.
Zirchiannaa a lan dan chuan Premier League club-ten hmun dang aṭanga an sum hmuh belhkhawm chanve aiin television deal aṭanga an sum hmuh ala tam zawk a, hei hi a zat chu pound tluklehdingawn 1.9 niin a tam tham hle.
Season thum chhung chu a zawnin Premier League club-te hlawkna belhkhawm hian pound maktaduai 500 a pel tawh bawk a, mahse hlawh atana an insen erawh 12% a pungin pound tluklehdingawn 2.3 a ni.
Zirchianna neitu zinga mi Dan Jones chuan Premier League club-te television deal-a an sum hmuh zat punna chhan ber chu Europe-a football thuneitu sangin Premier League club-te hnena a sum pek ṭhin pound maktaduai 100 laia a tihpun vang niin a sawi.
Europe-a 'big five' an tih - England, Italy, Germany, Spain leh France-a league te sum hmuh zat a pung vek a, 2015-16 season-a Europea football market-a sum chevel hi pound tluklehdingawn 22 niin 2014-15 season aṭanga khaikhinin 13%-in a pung.