Novak Djokovic a phun nawi!

Thawhlehni zan khan Novak Djokovic-a'n Adrian Mannarino chu 6-2, 7-6 (7-5), 6-4 a hnehin Wimbledon quarterfinal a lut a, hnehna a chan hnuah Serbian tlangval hian inelna kalhmanga fuh tawk lo nia a hriat ṭhenkhat a sawi chhuak.

Seeded pahnihna Djokovic leh Mannarino te hi Thawhṭanni zana inkhel tur kha an ni a, Court One-ah Rafael Nadal leh Gilles Muller te inkhelh zawh hnua inkhel ve tura ruahman a ni.

Amaherawhchu, Nadal te hi darkar li leh minute 27 chhung ngawt an inkhel a, set hnuhnung ber chu game 28 ngawt khelin an hnunga inkhel tur Djokovic te hi Thawhlehni zan atan sawn an ni a, nizan khan quarterfinal khelhzui niin player pariat zingah Djkovic chiah hi a zan zawna inkhel awmchhun a ni.

Grand Slam vawi 12 cham­pion tawh Djokovic chuan, "Inkhelh hun sawn hi thutlukna dik lo tak niin ka hria, Centre Court kha zan dar 7:00 (Keini lama dar 11:30) hmain a awl hman a, a inkhelhna tur hmun kha sawn theih a ni," tiin ruah a sur palh pawha chung khuhna nei Centre Court lamah inkhel sawn mai theih a nih thu a sawi.

Wimbledon-ah hian deciding set khelh a ngaihin (mipa tan set ngana, hmeichhe tan set thumna) 6-6 a nih hnuah, an in service chhawk a, game hnih la zawn thei hmasa zawk zawkin hnehna an chang ṭhin; US Open lamah erawh set hnuhnung berah pawh tie break hman niin inkhelh hun chhung rei fal lutuk awm ṭhin kha an pumpelh theia ngaih a ni.

Kum 30 mi Djokovic chuan, "Set ngana pawh nise tie break hmanga chak zawk zawn mai hi thil ṭha tak niin ka hria, mipui en duh ber chu inkhel hmuhnawm a ni a, a lehpeka inkhel hmuhnawm lantir zui tur chuan match khata darkar nga vel inkhelh chu a ṭha lo a ni. Player-te taksa hriselna a tan pawh a ṭha lo," a ti. Djokovic hian third round an khelhna grass chu a ṭhat tawk loh thu a sawi chhuak tawh bawk.

Wimbledon buatsaihtu lam chuan inkhelh hun an sawn loh chhan hi entu mipui innek buai an hlauh vang niin an sawi a, chhiatna lian a thlen an hlauh vang niin an sawi bawk. Hetihlai hian tennis hranghlui leh legend te zingah Djokovic thusawi thlawptu an ṭhahnem hle.