India cricket team coach thar Ravi Shastri

Anil Kumble-a'n, "Virat Kohli nena kan inkar ṭha lo hi siam ṭhat theih a ni tawh lo," tia India coach hna a bansan hnuah India cricket team chuan coach thar an nei ta - a hming chu Ravi Shastri a ni.

India captain hlui Ravi Shastri hian kum 2019 World Cup tawp thlenga India enkawl turin contract a ziak a, Indian bowler hmingthang ṭhin Zaheer Khan chu bowling consultant-ah ruat niin Rahul Dravid chuan ram pawna Test match bikah batting consultant hna a chelh bawk ang.

Sehwag ngam loh Shastri

May thla khan Board of Control for Cricket in India (BCCI) chuan India coach hna a dil theih thu an chhuah a, diltu zingah Indian legend Virender Sehwag hming a langsar hle. Mahse, dil hun chhung July 9 thlenga pawhsei leh a nih khan Shastri hi coach hna hi dil turin Cricket Advisory Committee (CAC) zinga mi Sachin Tendulkar chuan a nawr niin an sawi.

India captain hlui hian coach hna a dil ta ngei a, rin lawk ang ngeiin coach atan lak a ni. He dinhmun luah tur hian India opener Virender Sehwag, Sri Lanka coach hlui Tom Moody, Af­gha­nistan coach Lalchand Rajput leh director of West Indies cricket nilai Richard Pybus-te a khum a, a tawnhriat ngah piah lamah India captain Virat Kohli nena an inṭhian-

ṭhatna chu coach dinhmun a luah theih chhanah hian an ngai.

Tu nge Shastri?

Kum 55-a upa Shastri hi India cricket team-ah a mikhual lo hle a, August 2014 - April 2016 in­kar khan India cricket team director hna a lo chelh tawh. Shas­tri director-na hnuaiah India hian ram pawn tournament-ah a zawnin semifinal an thleng vek a, UCC Test ranking-ah thla riat chhung pakhatna dinhmun luahin Australia chu an ram leilungah ngei T20 series-ah 3-0 in an hneh bawk.

Ravi Shastri hian a vanglaiin India tan test match 80 a khel a, ODI match 150 ngawt a inlan bawk. Test-ah run 3830 siamin ODI-ah run 3108 a siam bawk a, test-ah wicket 151 lain ODI-ah wicket 129 a la thung. A hunlaia all rounder ṭha ber pawl a ni ṭhin - khelmual chhunga a tawnhriat India team tan a hman an beisei ang.

Tu nge ruattu?

India coach thlan hna hi Cricket Advisory Committee (CAC) kuta dah a ni a, CAC-ah hian Indian legend ṭhah Sourav Ganguly, VVS Laxman leh Sachin Tendulkar-te awmin anni hian India coach tura dilte chu interview an nei. CAC vek hi nikum June-a Ravi Shastri aia Anil Kumble thlangtute kha an ni a, Ganguly phei chu vantlang hriatin Shastri nen an inkhak hial - kum khat a liam a, engkim theihnghilh a ni tawh.

CAC hian Thawhṭanni khan India coach ruat tur hian captain Virat Kohli ngaihdan an lak ve phawt tur thu an lo sawi tawh a, Thawhlehni tlai kha chuan India coach tur hi chiang tawhah ngaih a ni. Mahse, BCCI-in official taka Ravi Shastri an lakluh thu an puan erawh zan dar 11:00-ah a ni a, "player leh coach anga tawnhriat ngah tak a ni," tiin an coach hming an puang chhuak.

Hna hmasa

Anil Kumble-a'n kum khat lek India a enkawl chhungin West Indies, New Zealand, England, Bangladesh leh Australia lakah India-in test series an la thei a, New Zealand leh England lakah ODI series lain Champions Trophy-ah final an lut bawk - Ravi Shastri hnathawh tur hi a awlsam dawn lo.

Shastri hian India leh Sri Lanka inkhelh hun aṭangin a hna hi a chelh ṭan ang. July 26-ah match hmasa ber khelh a ni dawn a, ṭhenawm ram nen hian test match pathum, ODI match nga leh Twenty20 match khat an khel ho dawn a ni. India hian karhmasa Ningani khan West Indies chu ODI series-ah 3-1-1 in an hneh a, Pathianni khan T20 match khatah Windies hi wicket kuain an ngam lo thung.