Silverstone inhnukdawk dawn

Formula 1 British Grand Prix an tlanna Silverstone circuit neitu British Racing Drivers’ Club (BRDC) chuan inremna thar an nei a nih ngawt loh chuan kum 2019 thleng bak intlansiak an thlen theih loh tur thu an sawi.

Kum 1987 aṭang khan Sil­verstone tlankawngah hian British Grand Prix hi tlan ṭhin a ni a, an contract neih lai hi kum hnih hnuah a tawp dawn - Pathianni tlai hian kumin atan tlan a ni ang.

BRDC chuan thuchhuah siamin, "Hun harsa kan tawng mek, kum 2015 khan pound maktaduai 2.8 kan hloh a, nikum khan maktaduai 4.8 kan hloh thung. Kuminah pawh hian season hmasa a mi zat vel hi kan hloh leh tura ngaih a ni. Inremna thar kan nei a nih ngawt loh chuan kan tan a ngai anga kal reng theih a ni lo," tiin a sawi.

Car intlansiakna ngaihhlut ber Formula 1 hi kum 1950 khan Silverstone-ah hian tlan ṭan a ni a, kum 30 liam ta aṭang khan British GP tlan nan hman ziah a ni. Khawpui danga intlansiakna thlengtu hi chuan an ram sorkar puihna an dawng ṭhin a, Silverstone erawh hi chuan sorkar aṭangin chhawmdawlna an hmu ngai lo a ni.

Formula 1 neitu Liberty Media lam pawhin thuchhuah siam ve nghalin, "Kartawpah British GP tlan a ni dawn a, hetihlaia BRDC-in tun hnaia an thutlukna an puang mai hi a mak hle. Keini lam chuan F1 intlansiakna ṭha tak neih chhunzawm kan duh a, kartawp a tlan tur pawh hi a hlawhtlin ngei theih nan theihtawp kan chhuah ang," tiin a sawi.