Murray leh Djokovic an tla

Tennis tournament upa ber Wimbledon khelh mekah khaw­tual tlangval Andy Murray tawp­na ni a thleng a, champion tura rinkai zinga pakhat Novak Djokovic chu a kiu hliam vangin a beiseina a thamral zui ve nghal bawk.

Nilaini zan inkhelah cham­pion lai Murray hi seeded 24-na Querrey nen darkar hnih leh minute 42 an khelh hnuah 3-6, 6-4, 6-7 (4-7), 6-1, 6-1 in a tlawm, American mipa tennis star zingah kum 29 mi Quer­rey hi Andy Roddick (2009) hnua Wimbledon semifinal lut leh thei hmasa ber a ni.

World number 1 Murray a chak loh hnuah Djokovic-a'n Tomas Berdych a hmachhawn ve leh. Serbian tlangval hian hnehna changin semifinal lut sela chuan karleha world ranking chhuak tharah number 1 a ni thei dawn. Mahse, Court One-ah Djokovic hi 7-6 (7-2), 2-0 a a hnufual zawk laiin a kiu na vangin a khel zui thei lo - Murray number 1 a nih chhunzawm dawn.

Querrey a hrang!
Centre Court-a inkhelah Murray-a'n hartsatna nei loin set hmasa ber a la a, set hnihnaah pawh 5-4 a hma a hruai laiin a service zui bawk - mahse a service a hloh a, Querrey-a'n a service a hum zui theih si avang­in set a hloh zui bawk.

Kum 30 mi Murray-a'n tun hma lama vawi riat a hneh tawh Querrey lakah hnehna a chang zawk tura ngaih a la ni tho. Amaherawhchu, American tlangval hian a ball vuak nat a hmangṭangkai chho a, aces vawi 27 zet vua in a service a hloh duh mang lo.

Querrey hian na taka attacking game khel zuiin winners vawi 70 a hlap a, heng zinga 30 chu net bula kal hnai chunga a vuak chhuah a ni, defending ṭha tawk lo Murray tan thawh leh ngaihna a awm tawh lo - Murray hian set hnuhnung pahnihah game hnih chiah a la ve thei!

Wimbledon vawi hnih cham­­pion tawh Murray chuan, "Inel­na neih ṭan dawn khan ka khel bawrah hliam ka nei a, tour­nament tir lam kha chuan ka hlauthawng deuh. Querrey laka hnehna chang tur khan ka theihna zawng zawng ka hmang a, mahse a tawk zo lo a ni," tiin a sawi.

Novak a na
Grand Slam vawi 12 cham­pion tawh Djokovic-a'n a vawi li nana Wimbledon nomawi chawi a tumna chu a thlawn rih. World number 4 Djokovic hi Thawhṭanni zan khan last 16 khel tur an ni a, Rafael Nadal te inkhelh chhung a rei em avangin Thawhlehni zanah sawn a ni.

Thawhlehni zan­ah Djokovic hian Adrian Mannarino a hneh ṭumin a dar (shoulder) hliam avangin enkawl a ngai a, quar­ter­final-a kum 2010 Wimbledon finalist Berdych a ngam loh chhan erawh a kiu (elbow) vang a ni thung.

Kum 30 mi Djokovic chuan, "Tun ṭuma ka hliam hi ka dar ni loin ka kiu zawk a ni, hei hian kum khat leh a chanve dawn chu min ti buai tawh. Minute 30 chhung kha chu ka inkhel lui thei mai a, mahse ka service leh forehand-ah harsatna ka neih miau avangin tih luih chhunzawm theih a ni lo," tiin a sawi.