MPL club an chak vek

Nimina Lalbiakliana Memorial MFA Super Cup inkhelah Mizoram Pre­mier League club pathum Bethlehem Veng­thlang FC, Ramhlun North FC leh Aizawl FC ten hnehna an chang vek a, BVT hi tun inelnaa quarterfinal lut hmasa ber an ni.

BVT an vannei

Nimin Lammual inkhel hnuhnung berah BVT-in minute 28-naa Rameng­mawia tauh goal hmangin hma hruai mah se Venghnuai lakah an chungnung thei lo. First division club hian Zohming­mawia penalty hmangin an sut a, goal dang khung belhna hun ṭha pawh nei mah se BVT keeper Lalruatpuia khelh ṭhat ni an tawng.

Venghnuai FC-in an finishing ṭhat loh an tuar a, minute 83-naah BVT captain Lalrammawia'n chakna goal a khung. Season liam taa second division champion Venghnuai FC-in an hun ṭha neih an bawhpelh an ui ang a, Chawngthansanga hote erawh training-naah tlarhnung rem phui dan an zir ṭhat leh a ṭul dawn a ni.

Venghlui Vs Ramhlun

Piler FC lakah Venghlui FC in­chhuang thei an ni lo a, goal an phur hmasak hnuah 4-2 in an chak hram a. Ramhlun FC-in Eric Pazawna goal awm chhun hmangin Saikhamakawn 1-0 in an hneh ve bawk.

First division club pahnih hi vawiin tlai dar 2:00 hian an inhmachhawn lehnghal dawn a, hahdamna hun ṭha an neih loh avangin rilru paukhauh a ṭul ang.

Ramhlun North chak

RG Stadium inkhelah Ramhlun North FC-in Durtlang club FC Ramthar 4-1 in an hneh a, an player neih ṭhat an hlawkpui. ONGC aṭanga Ramhlun North zawmtu V. Lalchhuanawma'n an veng club tana a goal hmasa bera a khung a, Jessy Vanlalmuana'n match zawnin goal hnih a khung a, ISL club Mumbai City player hlui Lalrinfela'n goal khat a khung ve bawk.

MPL club Ramhlun North hian Inrinni khian last 16-ah Aizawl FC Academy an hmachhawn dawn. AFC Academy hian MFA Grass­roots lakah David Lalhlansanga, Lal­hruai­­­tluanga Pachuau leh Augustine Lalrochama te hmangin 3-0 in hma an hruai tawh a, amaherawhchu second half-ah Lalramtiama leh

Ricky Rohmingliana te chu insum theih loh vangin red card pek a ni a, MPL club an hmachhawn hunah an nem sawt ang.

AFC an tho ta

Aizawl FC-in MPL champion Chanmari FC laka goal an khung theih loh hnuah FC Khatla lakah an inhri thla a, third division club lakah hian an hming kimin goal an khung.

I League champion tan Lalruatfela Zote-in goal li a khung a, Rochharzela leh H. Lalmuankima ten goal hnih khungin Jonathan Lalhriatkima leh Lalremsanga Fanai ten goal khat ve ve an khung a, FC Khatla player Ram­dinmawia'n an lamah a ti goal bawk.

Lammual
Group D - Second Round
Piler FC 2 - 4 Venghlui FC
PIL : Lalrinmawia 5', 52'
VEN : Vanrammawia 37', 71'; K.Roluahpuia 49'; MC Vanrammawia 90+3'
Ramhlun FC 1 - 0 Saikhamakawn
RFC : Eric Pazawna 38'
Group A - Pool Final
Venghnuai 1 - 2 Bethlehem VT FC
VEN : Zohmingmawia 35' (P)
BVT : Ramengmawia 28'; Lalrammawia 83'
Rajiv Gandhi Stadium
Group E - Second Round
Aizawl FC Academy 3 - 0 MFA Grassroots
AFC : David Lalhlansanga 5'; Lalhruaitluanga Pachuau 33'; Augustine Lalrochama 45+2'
Ramhlun North FC 4 - 1 FC Ramthar, Durtlang
RAM : V. Lalchhuanawma 13' ; Jessy Vanlalmuana 39', 86'; Lalrinfela 64'
FCR : Lalrintluanga 69'
Group F - Second Round
FC Khatla 0 - 11 Aizawl FC
AFC : Lalruatfela Zote 15', 20', 51', 74'; Ramdinmawia 34' (OG); H. Lalmuankima 37', 64'; Jonathan Lalhriatkima 41'; Lalremsanga Fanai 52'; Rochharzela 75', 88'