Vawi 100 chak thei Roger Federer

Roger Federer-a'n Wimbledon singles match bikah vawi 100 hnehna a chang tling ta. Swiss star hian Nilaini zan khan Centre Court-ah Milos Raonic lakah 6-4, 6-2, 7-6 (7-4) a hnehna changin semifinal a inhlangkai.

Kum 35-a upa Federer hian season hmasa khan semifinal-ah Canadian tlangval Raonic hi a ngam lo a, kuminah erawh darkar khat leh minute 58 chhung lekin hnehna a chang thei. Federer hian aces vawi 10 siamin winners vawi 46 a vua a, a service aṭangin point 19 chiah a hloh - seeded 6-na Raonic tan thawk lakna hun a awm lo a ni ber.

Federer hian vawiiin tlai dar 5:30-ah Novak Djokovic hnehtu Tomas Berdych a hmachhawn leh ang. Grand Slam vawi 18 champion tawh Federer hian Wimbledon nomawi vawi sarih a chawi tawh a, kuminah hian a champion leh a nih chuan record thar a ni ang.

Player langsar pathum Rafel Nadal, Andy Murray leh Novak Djokovic te an tlak tawh avangin Federer hian final a lut a nih pawhin tun hma lama a la hmachhawn zin loh player a bitum dawn tih a chiang tawh.

Federer chuan, "Rafa-a'n theihtawp chhuaha a beih hnuah a tla a, Andy a fit tawk lo tih a hmuh theih bawk. Novak-a'n hard court season duhawm a hman theih ka beisei, tun tournament atan chuan thawnthu ngaihnawm tak pakhat chu a ni," tiin a elpui tla tate chungchang a sawi.

Quarterfinal inkhel pakhat zawkah US Open champion hlui Marin Cilic chuan Rafael Nadal hnehtu Gilles Muller chu 3-6, 7-6 (8-6), 7-5, 5-7, 6-1 in a hneh ve thung. Cilic hi final lut tur chuan vawiin tlai dar 5:30-ah American Sam Querrey a paltlang a ngai ve leh dawn a ni.