City hnartu Alves-a'n PSG a zawm

Brazil full back Dani Alves chu Manchester City nen sawizawm hlawh viau mah se rin loh takin France lam a hawi a, Paris St-Germain tan season hnih chhung khel turin contract a ziak.

City hian kum 34-a upa defender hi kum hnih chhung atan contract ziahpui inhuam mah se PSG-a kar khata a hlawh tur zat £230,000 erawh pek ve an inhuam lo nia sawi a ni a, Brazil international hian sum pe hnem thei zawk PSG lam kal a thlang ta a ni.

Alves hian season hmasa ṭan dawn khan Bar­celona aṭangin Juventus a pan a, Italian club tan hian Serie A leh Coppa Italia nomawi a chawi bakah Champions League final a hruai thleng. Brazilian defender-in chona thar hmachhawn a duh thu a sawi avangin Italian club hian nipui transfer bazar inhawn rualin a contract an tihtawp sak a, PSG hi free transfer-in a zawm.

PSG defender thar Alves chuan, "Paris khaw­puiah hian nomawi chawi turin ka lokal a ni. Tun hnaia PSG hma­sawnna hi ka mit ngeia hmuin European football-a club ṭha ber pawl an nih dan pawh ka hmu ve vek a, he club-in hmasawn zel a tumna kawnga ka tel ve thei hi ka lawm takzet a ni," tiin a sawi.

Manchester City-in Dani Alves an chan tak­ah chuan Tottenham Hotspur right back Kyle Walker lamah an rilru an sen lehzual a ngai dawn. Pep Guardiola enkawl club hian Pablo Zabaleta leh Bacary Sagna an chhuahtir hnuah an hmun ruak turah player lak an la nei lo a, Thawhṭanni hian pre season friendly match Manchester United, Real Madrid leh Tottenham-te nena khel turin USA an pan ang.