Goal khung tam tur Chhinga Veng leh Police? Chanmari West kalkawng a awlsam lo

Lalbiakliana Memorial MFA Super Cup 2017-ah a ruh no apiang an chhuak zel a, District FA hnuaia club zingah Mizoram Premier League club hneh thei an la awm lo. Vawiin hian match ruk a awm dawn a, Lammualah last 16 khelh a ni ang a, Rajiv Gandhi Stadium-ah second round khelh a ni thung ang.

MPL club Chhinga Veng FC leh Mizoram Police te an inlan dawn a, team pahnih goal khung tawh zat belhkhawm hi goal 33 a ni. Chhinga Veng hian nikum lama anni aia thleng sang Chawnpui FC an hmachhawn dawn a, goal khung leh nual an tum ang. Kolasib Ṭumpui GSA tan Lengpui 10-0 a hnehtu Police hmachhawn a châkawm lo bawk.

Chanmari West FC-in SYS Academy an hneh hram hnuah Kanan FC an hmachhawn dawn a, Hunthar FC 8-0 a hneh thei third division club Kanan hi West Warrior tan mualpho theihna tur a ni.

Goal leh Chhingcows

Lammual match hmasa berah Chhinga Veng leh Chawn­pui an inkhel dawn a, he inkhela chak zawk hian quarterfinal-ah Bethlehem Vengthlang FC an hmachhawn ang.

Chhinga Veng FC-in match hnih lekah goal 23 an khung a, player 10-in goal an khung tawh. Goal khung tam ber Mal­sawmfela'n goal nga a khung tawh a, goal thum khung thei pali zinga pathum Lalram­muanpuia, Laldampuia leh MS Dawngliana te pawh top scorer atana iai awm loh vek an ni.

Ramhlun North aṭanga Chhinga Veng zawmtu Lal­chhuan­­­puia'n goal thum a khung ve tawh bawk a, Chhing­cows tana hriat nuam tak tur chu match hnihah goal an la chhuah lo a, an defender-te hian goal venhim chauh duh tawk loin an khingpuite lamah an khung zawk a ni.

Chawnpui FC-in goal an la chhuah bik lo a, amaherawchu Khatla South leh FC Armed Veng South lamah goal thum chauh an khung. Season liam taa semifinal thleng thei Chawnpui tan quarterfinal thleng pha tur pawhin tlarhnung rem phui ṭhat a ṭul khawp ang.

Lammualah Sailam

Chhun dar 12:00-ah in 150 bawr vel lek awmna Sailam FC leh Durtlang Leitan FC te an inkhel dawn a, eng result pawh thleng thei a ni.

Sailam hian an mumang ram aṭanga thawhchhuah an la duh lo a, Leitan-in hun ṭha bawhpelh an tum lo bawk.

AFC khingpui tur Police?

Aizawl FC-in harsatna nei loin FC Khatla an nei a, last 16-a an khingpui tur chu vawiin chawhma dar 11:00-a Mizoram Police leh Kolasib Ṭumpui GSA inkhela chak zawk a ni.

MFA Super Cup atana in­puah­chahna nei ṭha ber Mizo­ram Police-in Kolasib Ṭum­pui an hneh ngei a rinawm. Police forward Lalbiakhlua, Lalfak­zuala, Lalsangbera leh F. Lalrinpuia te a inlan a nih phawt chuan scoresheet-ah hming nem kai an tum vek ang.

Group G lam...

Aizawl DFA third division club pahnih Hming Hming FC leh Zauva Memorial FC tan last 16 kawng a inhawng a, inkhingtawk tura ngaih an ni.

RG Stadium inkhel hnu­hnung bera Chanmari West leh Kanan FC inkhel tur hi MPL club leh third division club inkhel tur ni mah se match hmasa bera an inkhel result avangin chak chiang an awm lo.

Kanan coach Zosangliana chuan, "Chanmari West hi team ṭha tak an ni a, player pawh an nei ṭha. Amaherawhchu an ṭhat dan tura an la khelh chhuah bik loh avangin beisei kan nei a ni," tiin Vanglaini a hrilh a, hei hian inkhelh dan tur hmang a sawifiah ṭha hle.

Kanan hi 8-0 tehmeuha first round paltlang an nih avangin an phur a ni thei a, amah­erawhchu West Warrior lakah erawh goal venhim an ngaih pawimawh hmasak a ngai. Chanmari West hian MPL-a player langsar Lalnunmawia an lalut a, Ramhlun South tlangval hian goal hnih a khung tawh. Hming langsar dang Jacob Lalrawngbawla'n Shillong Lajong tana a tih ṭhin ang thoin a club thar tana a match hmasa berah freekick aṭangin a khung a, Kanan tan ṭul loa foul a thiang lo ang.

Vawiin Inkhel Tur
Lammual
Group B - Pool Final
10:00 AM Chhinga Veng FC Vs Chawnpui FC
Group C - Pool Final
12:00 PM Sailam FC Vs Durtlang Leitan FC
Group D - Pool Final
02:00 PM Venghlui FC Vs Ramhlun FC
RG Stadium
Group F - Second Round
11:00 AM Mizoram Police FC Vs Kolasib Ṭumpui GSA
Group G - Second Round
01:00 PM Hming Hming FC Vs Zauva Memorial FC
03:00 PM Chanmari West FC Vs Kanan FC