Lacazette-a'n goal khung nghal

Arsenal chuan nimin tlai khan season thar in­buat­saihna match hmasa ber atan A League Cham­­­pion Sydney FC an hma­chhawn a, Gun­ners player manto ber Alexan­dre Lacazette-a'n goal khung nghalin 2-0 in an chak.

ANZ Stadium-a in­khel­ah pound maktaduai 46.5 man Lyon striker hlui hi minute 68-naah bench aṭangin a lut a, khelmualah minute 15 chiah a awm hman tihin Alex Iwobi cross chu chiang zetin a khung, goal hmasa zawk hi inkhel ṭan aṭanga minute lina leka captain Per Mertesacker khung a ni thung.

Inkhelh ṭan hmain Gun­ners hian thu lawm­awm an nei bawk - midfielder Mesut Ozil-a'n Emirates Stadium-a cham chhunzawm zel a duh thu a sawi. Kum 28 mi Ozil chuan, "Australia leh China-a kan zin zawh hnuah London-ah kan kir ang a, contract thar chungchang kan sawiho ang. Ka sawi fo tawh angin Arsenal-ah hian ka hlim a, he hmuna cham zel hi ka duhthlanna chu a ni," tiin a sawi.

Germany international hian kum khat daih bak contract a nei tawh lo, manager Arsene Wenger-a kaihhruaina hnuaia awm chhunzawm zel a duh thu a sawi hi Gunners fan-te tan chuan thu ngaihthlak nuam tak a ni ngei ang.

Inrinni tlai dar 3:30-ah Arsenal hian Western Sydney Wanderers an hma­chhawn leh dawn a, chumi hnuah Chelsea leh Bayern Munich nena inkhel turin China an pan dawn a ni.

Confederation Cup khelh vangin forward Ale­xis Sanchez leh defen­der Shkodran Mustafi ten squad an la zawm lo a, Euro U21-a Spain aiawhtu Hector Bellerin pawh zin zingah a la tel lo.