AFC player thlanchhuah zingah Lianzuala

July 15-ah 2018 AFC Asia Cup Under 23 Championship qualifying khelh ṭan a ni dawn a, ram 39-in hmun ruak 15 an inchuh dawn. Asian Football Confederation official website the-AFC.Com chuan hemi pual hian player en bik tur 10 an thlang chhuak a, Mizo rawlthar Lallianzuala Chhangte chu thlan zingah a tel. Ram 39 aṭanga player 10 thlan khawm an nih avangin Lallianzuala hming bula Asian rawlthar duhawm thlan chhuahte hi an langsar hlawm hle.

China rawlthar, Shanghai SIPG winger Wei Shihao, Iran rawlthar beiseiawm Mehran Derakhshanmehr, Iraq senior team-a tel phak Bashar Resan, Indonesia international Evan Dimas, 2015 FIFA U20 World Cup quarterfinal-a Uzbekistan hruai thleng thei Zabikhillo Urinboe, kum 18 leka upa nichunga Australia international Riley McGree, Japan chhuanvawr Koji Miyoshi, Saudi Arabia international Sami Al Naji, 2017 FIFA U-20 World Cup leh 2015 FIFA U-17 World Cup-a South Korea captain ni thei Lee Sang-min te an ni.

Lalianzuala Changte hian December 27, 2015-ah khan SAFF Championship lamah India senior team tana a goal hmasa ber khungin goal ropui pahnih a khung a, India tana goal khung thei naupang ber dawttu niin a tluk loh hi Mizo tlangval Jerry Zirsanga a ni.