India U23-in Singapore an ngam lo

AFC Asia Cup Under 23 Championship qualifying match khel tura inbuatsaih India chuan Nilaini zan khan Singapore U23 nen a vawi hnih nan friendly match an khel a, inkhel hmasa zawkah 1-0 in chak mah se a vawi hnihnaah erawh mualneitu an ngam lo, 1-0 in an tlawm.

Inkhel hmasa zawkah India U23 tan Lalruatthara chuan cap­­tain armband a hreng a, match hnihnaa India captain pawh Mizo tlangval bawk a ni - Serchhip striker Daniel Lal­­­­hlimpuia chuan captain arm­band hreng chungin inkhel bul a ṭan.

Mizo tlangval

India U23 squad-ah Mizo paruk an awm a, panga an inlan. Singapore U23 nen an inkhelh hmasaka inkhel bul ṭantu Lalruatthara, Jerry Lalrinzuala leh Daniel Lalhlimpuia-ten a vawi hnih nan inkhel bul an ṭan a, Stephen Constantine enkawlna hnuaiah Mizo tlangvalte an pawimawh tih a lang chiang.

British manager hian match hmasa zawkah Lallianzuala Chhangte chu bench aṭangin a luhtir a, Lunglei rawlthar hian a hun neihchhunah a theihna a pholan avangin rin nawn a hlawh - match hnihnaah hian inkhel bul ṭantir a ni. Match hmasaa inlan lo Sairuatkima chu minute 75-naah tlan luhtir a ni bawk a, Jerry Mawihmingthanga tan erawh hmun a la awm rih lo.

Inkhel chu

Choa Chu Kang Stadium-a inkhelah minute sarihna lekah India goalkeeper Vishal Kaith-a'n hna a nei nghal a, Shillong Lajong goalkeeper hian hnai set sawt aṭanga Singapore goal shot a save hnu lawkah goal line aṭangin India defender-ten ball an petchhuah a ngai bawk - India an talbuai.

Mahse, minute 16 a liam a, India-in chance an nei ve lehnghal. Mual sir lam aṭangin winger Manvir Singh chuan ṭha zetin ball a lalut a, mahse captain Daniel Lalhlimpuia'n a chhawr ṭangkai hman lo. Singapore an hlauhawm chhunzawm a, Ikhsan Fandi chu India tlarhnung tan buaipui tham a ni.

Mikhual team-in winger duh­awm Manvir Singh hmang­in Singapore tlarhnung an chhaih buai ve reng bawk a, minute 26-naah Nikhil Poojari-a'n a hun ṭha neih holam taka a 'tauh' chu a ui ve khawp ang. Minute 45 chhungin Singapore an chungnung zawk a, goal lut loin chawlhlawk hman a ni.

Goal khat

Second half ṭan a ni a, East Bengal midfielder Nikhil Poojari bawkin chance a nei nghal. Kum 21-a upa midfielder hian second half ṭan aṭanga mi­nute lina lekah hla tak aṭangin shot a nei a, goal post sir chiahah a kal. India-in an chance neih hmasak an chhawr loh rah an seng a, minute 51-naah penalty an chawi.

Bengaluru FC defender Salam Ranjan Singh chuan ṭul loah Syahrul chu penalty area-ah a ti tlu a, referee-in penalty spot a kawk. Singapore tan an chhuanvawr Ikhsan Fandi a lo pen chhuak a, kum 18 leka upa forward hian goal chung kil sirah a pet lut. India-in an si phurh sut tumin an nawr chhunzawm a, counter attack-ah Singapore an hlauhawm thei hle.

India tan substitute Alen Deory chuan minute 83-naah hun duhawm bik nei mah se goal ruakah a khung thei lo a, Shillong Lajong winger-in India mualphona tur khuh tura hun ṭha a neihah ama mualphona a thlen. India tan Manvir Singh-a'n Poojari tan ball ṭha zet a siam sak a, East Bengal midfielder a offside. India-in chance dang an nei tawh lo a, 1-0 in an tlawm.

Hmabak

India U23 hian July 15-ah AFC U23 qualifier an khelhna tur Doha lam an pan nghal ang. AFC U23 Qualifier hi July 19-ah khelh a ni dawn a, India hi Group C-ah awmin Qatar, Turkmenistan leh Syria te nen an awmho a, an hmabak a awlsam dawn lo hle.

Blue Tigers boss Constan­tine chuan, "Kan result avang­in ka lawm lo. Ka nauten theih­tawp chhuahin khel mah se tlarhmaah kan hriam tawk lo, mah se inkhel pumpui thlir erawh chuan a tlawm zawk nih hi kan phu chuang lo," a ti.

English manager chuan sawi chhunzawmin, "Tuna kan rilrua awm ber pakhat chu senior team tana khel tlak player ngaihven a ni a, tuna an khelh dan anga an chhunzawm zel chuan kan naute zinga ṭhenkhat hi chuan senior team tan an khel ang," tiin a sawi.