FC Goa-ah Spanish winger a lut

Indian Super League club FC Goa chuan Spanish winger Manuel Jesus Arana Rodriguez chu season khat chhung atan an lalut. Kum 32-a upa winger hi La Liga-ah pawh lo tlangnel tawh a ni a, Indian football-ah pawh a mikhual lo ang.

Arana hian Spanish football-ah kum 15 hun a hman hnuin Australia lamah Brisbane FC a zawm a, match 24 a inlanah assist panga a nei. Real Betis Academy aṭanga inzirchhuak niin La Liga-ah Racing de Santander, Rayo Vallecano leh RCD Mallorca-te tan pawh a lo khel tawh.

Spanish winger chuan, "FC Goa tana contract ka ziak thei hi ka lawm takzet a ni. Tun hnaiah ISL hian ngaihven a hlawh em em a, he hmuna rawn kala eng ang chiah nge a lo nih reng hriat ve hi ka duh a ni. Club-in min rintawkna avangin lawmthu ka sawi a, kan phu ang result kan hlawhchhuah theih ngeina turin theihtawp ka chhuah ang," a ti.

Sergio Lobera enkawlna hnuaia khel tur FC Goa hian Arana hma hian Portugal U23 international hlui Bruno Pinheiro an lo lalut tawh a, Indian senior player an chelh theih pahnihah goalkeeper Laxmikant Kattimani leh winger Mandar Rao Dessai te chu contract thar an ziahpui tawh bawk.