Vettel leh Hamilton boruak a lian

Pathiani tlai dar 5:30-ah Formula 1 British Grand Prix tlan a ni dawn a, driver champion nih tuma inel mek hmahruaitu Sebastian Vettel leh a hnuai chiah awm Lewis Hamilton te chu car intlansiak inelna sang boruak luahtu an ni mek.

Tun season intlansiak vawi kua an neih tawh aṭangin Ferrari driver Vettel-a'n Mercedes driver Hamilton lakah point 20-in hma a hruai fal mek a, tun ṭumah hian chak tur zawk rinthiam a harsa rih hle.

German tlangval Vettel hian kuminah vawi thum hnehna a chang tawh a, Hamilton pawh hian ṭum thum tho hnehna a chang tawh - an danglamna chu Vettel hi pakhatna a nih loh ṭum pawhin podium a lawn phak ṭhin vang a ni.

Hamilton hian Russia, Monaco leh Azerbaijan-ah te beisei a phak lo a, intlansiak hnuhnung ber Austria Grand Prix-ah palina a ni bawk, tun ṭuma an tlanna tur erawh a zawna vawi thum a chak tawhna hmun a nih avang leh an ram a nih avangin inrintawkna a nei sang hle tura ngaih a ni.

Mercedes team boss Toto Wolff chuan, "Lewis hian team lam aṭangin thlawpna a dawng ṭha a, Silver­stone-ah pawh hian kan theihtawpin kan puibawm leh dawn a, result ṭha neih kan beisei hle," tiin a sawi.

Driver cham­pion­ship-ah Vet­tel-a'n hma hruai mah se team cham­pionship lamah erawh Mercedes-in point 287 hmuin pakhatna an ni mek a, pahnihna chu point 254 hmu tawh Ferrari an ni. Team lian pahnihte hian driver champion neih an duhtawk mai lo a, team champion nih an duh tel bawk avangin an inelna boruak hi a la ngaihnawm chho dawn chauh - India team Force India chuan point 89 hmuin team 10 inel zingah palina an ni mek.