UFC Fight Night 172 Flyweight champion thar Figueiredo

Brazilian fighter Deiveson Figueiredo chu UFC flyweight champion thar a ni ta. Kum 32 mi fighter hian nimin khan Joseph Benavidez chu technical submission hmangin round khatna lekah a hneh a, flyweight kawnghren awl chu a hlawh chhuak. 

Yas Island, Abu Dhabi-a fight ngaihven hlawhah hian Figueiredo-a'n hnehna chang turin hun a mamawh rei lo hle. Round khatnaa minute li leh second 48 chhung lekin rear-naked choke hmangin Benavidez hi a hneh a, American fighter hian tih theih a nei lo. 

Figueiredo chuan, "Mi zawng zawngin hneh an châk fighter chu ka ni a, ka lam an hawi ṭhup a ni," a ti zui a, a ṭawng pawr nghal hle - kar hmasa lawk khan Figueiredo hi Covid-19 a kai nia hriat a nih avangin nimina fight neih tur pawh hi a buai hman a, mahse test dang neih nawn a nih hnuah vanneihthlak takin a negative a ni. 

Hetihlai hian prelimi-nary card lama inlan Joe Duffy chuan lightweight fight-a Joel Alvarez a ngam loh hnuin MMA a chawlhsan thu a puang zui a, Irish fighter hian round khatna lekah submission (guillotine choke) hmangin Spanish fighter Alvarez hi a ngam lo. 

Duffy hian vawi 21 fight a hmachhawnah vawi 16 hnehna a chang a, vawi nga a tlawm - Alvarez a ngam loh hi a zawna vawi thum a tlawmna a ni. Duffy chuan, "Fight hmachhawn zel turin theihna ka nei sang tawk ta lo tih hi ka pawm a ngai a ni," tiin a sawi.