Sheffield-in Henderson an la beisei

Sheffield United manager Chris Wilder chuan goalkeeper Dean Henderson-a chungchangah Manchester United nen an inbiak thu a sawi a, English goalkeeper chu season tharah an chhawr theih a la beisei. 

Kum 23 mi Henderson hian tun season-ah clean sheet vawi 13 a nei tawh a, Burnley goalkeeper Nick Pope (15) leh Manchester City goalkeeper Ederson (14) te chiah a tluk lo. Amaherawhchu Manchester United-in David de Gea an nei a, English keeper hian a khelh tam theihna tur club a zawn a rinawm.

Sheffield boss Chris Wilder chuan, "Dean leh Manchester United ten kan thlir dan an hria, season thar chungchangah club leh player-te pawh kan be tawh. Club leh player in thutlukna an siam a ngai a, keini chuan kum khat atana contract pawhsei leh theih ngei kan beisei," tiin goalkeeper chungchang a sawi.

Manchester United manager Ole Gunnar Solskjaer chuan loan-a Blades tana khel mek Dean Henderson chu England leh Manchester United number 1 ni thei turin sawi mah se a keeper neih lai De Gea chu khawvela keeper ṭha berah a chhal a, hemi a nih avang hian Henderson-a'n khelhna hmun chan a duh a nih chuan Bramall Lane-a cham a fuh ang.

Blades hian keeper Wes Foderingham chu free transfer-in an lalut a, hemi chungchang hi sawifiahin Wilder chuan, "Wes-a'n club a nei lo a, squad ti chak turin kan laltu. Dean thlakna tur atana tih a ni lo," tiin a sawi. Kum 29 mi Foderingham hian Rangers tan season nga a hmang a, a contract a zawh tak avangin free transfer-in Sheffield United hi a zawm.

Chris Wilder hoten zanin dar 10:30 hian an mualah Everton an mikhual dawn. Blades hian season thara Europe inelna tel an beisei a nih chuan Toffees hi an hneh ngei a ṭul dawn a ni.