Venus hmaa ding tur Muguruza

Tennis inelna upa ber Wimbledon hmeichhe singles final chu zanin dar 6:30 hian Center Court-ah khelh a ni dawn, vawi nga champion tawh Venus Williams hmaah Spain nula Garbine Muguruza a ding dawn.

Ningani zana semifinal khelhah seeded 14-na Muguru­za hian darkar khat leh minute nga chhung lekin Magdalena Rybarikova chu 6-1, 6-1 a sawpin final a lut. All England Club-ah final a vawi hnih khelh­na tur a ni a, a vawi khat nan nomawi chawi a tum dawn a ni.

Inkhel hnuhnung zawkah kum 37 mi Venus chuan khawtual nula Johanna Konta lakah 6-4, 6-2 in hnehna a chang thung a, kum 2008 hnua a vawi khat nan he hmunah hian nomawi chawi a tum leh dawn a ni - champion lai leh a unau ni bawk Serena Williams title chu Williams chhungkaw tan a humhim sak thei dawn em tih fiahin a awm dawn.

Venus lakah Konta a ral
Tennis ngainatna ram Britain-ah khawtual nula ten beisei an phak lohna a rei ta! Kum 40 liam ta khan Virginia Wade-i'n nomawi a chawi a, Wade hnuah All England Club-a hlawhtling leh thei an la awm lo.

Seeded parukna Konta-i'n kuminah British mite beiseina a siam sak a, quarterfinal-ah champion tura rinkai berte zinga mi Simona Halep a vuak tlak theih avangin an beiseina a sang zual. Mahse, semifinal-ah tawnhriat ngah Venus lakah a service vawi thum a hloh a, darkar khat leh minute 13 chhung lekin a chak lo zawkah a ṭang.

Grand Slam vawi sarih champion tawh Venus chuan, "Center Court chhunga mipui pungkhawm khan Jo kha an ṭanin an duhsak hle tih ka hria. Chutih rualin mipuitling tak tak kal khawm an ni a, ka chungah pawh ṭhat an chhuah hle," a ti.

Venus hian Wimbledon hi season 20 a khel tling ta a, singles match bikah vawi 101 hnehna chang tawhin tun ṭum hi final vawi kua a khelhna tur chiah a ni. Kumin bikah hian match sarih a khel tawh a, a match hmasa bera set khat a hloh bak a la hloh nawn leh lo - match ruk chhung straight set-in hnehna a chang tawh.

Feet 6 leh inch 1-a sang Venus chuan, "He hmunah hian final ka khel fo tawh a, nomawi chawi leh thei ni ngat ila chuan a hlutna a zual ang. Ka beidawng dawn lo a, title la turin ka theihtawp ka chhuah dawn a ni," tiin a sawi.

Spain nula
Conchita Martinez-i'n kum 1994 khan Wimbledon nomawi a chawi a, Martinez chiah hi Spain nula zinga Wimbledon champion thei a la ni. Tunah chuan Martinez hi coach a ni tawh a, a kaihhruaina hnuaiah Muguruza-i'n a sulhnu zui theihna hun ṭha a nei mek.

Kum 23 mi Muguruza hian Wimbledon final a vawi hnih khelhna tur a ni a, kum 2015 final khan Serena Williams lakah a chak lo zawkah a ṭang tawh. Season hmasa khan Serena nen hian French Open final-ah an intawng leh a, Paris-ah erawh Muguruza hian straight set-in hnehna a chang ve thung.

World number 14 Muguruza hian kuminah a khel ṭha hle, round hmasa lamah seeded pakhatna leh world number 1 ni bawk Angelique Kerber leh Grand Slam vawi hnih champion tawh Svetlana Kuznetsova a hneh thei a, semifinal-a a hneh Rybarikova hi tun season grass court-a result nei ṭha berte zinga mi a ni bawk - world number 87 Rybarikova hi match 18 a chak zawn hnua a chak lohna hmasa ber a ni.

Muguruza chuan, "Kei ngei pawhin khel ṭha ka inti hle, ka khingpui kha tun tournament-a tawhkhirh berte zinga mi a ni a, hetianga awlsam hian hnehna chan ka inbeisei lo," tiin a sawi.

Final thlir zuiin Muguruza chuan, "Grand Slam final luh hi a ropui tawh hrim hrim a, a sang pahnih zinga ka tel hi ka duhtawk tihna erawh a ni lo. Nomawi chawi ngei tumin ka theihna zawng zawng ka hlan dawn a ni," a ti. Player pahnihte hi tun hmain vawi li an inhmachhawn tawh a, record nei ṭha zawk Venus hi ṭum thum hnehna a chang.