Walker manah City leh Spurs an inrem
Manchester City chuan England right back Kyle Walker lalut turin Tottenham Hotspur chu inremna an neihpui tawh. City hian Walker manah hian pound maktaduai 45 thehchhuah an remti a, a khelh ṭhat dan a zirin a man hi pound maktaduai 50 thlengin a sang chho thei ang.
Kum 27-a upa defender hian nimin khan medical a nei tawh a, he thuziak i chhiar meuh chuan Manchester City player a ni tawh hial ang. Walker hian Thawhṭannia USA-a tour neia zin chhuak tur City squad a zawm nghal ang a, Pep Guardiola chuan an zinchhuah hma hian pound maktaduai 40 man Monaco left back Benjamin Mendy chu lakluh hman ngei a tum bawk. France international Mendy hi Switzerland-a pre season nei tura zin chhuak Monaco squad-ah pawh a tel tawh lo.
England tana vawi 27 inlan tawh Walker hian kum 2009 khan Sheffield United aṭangin Spurs hi a zawm a, London club tan hian Premier League-ah match 183 a inlan tawh. Season hman zawh takah khan Premier League team of the year-ah a lang phak a, nipui transfer-ah City-in midfielder Bernardo Silva leh goalkeeper Ederson Moraes an lakluh hnua an player lei pathumna a ni.