Match 3-a goal 37 khung thei Chhinga Veng!

Transfer laia thawm nei lian ber Chhinga Veng FC chu Lalbiakliana Memorial MFA Super Cup ṭan hnuah pawh an boruak a la sang zel a, quarterfinal thleng turin goal 37 an khung tawh!

MPL club Chhinga Veng hian Bethlehem Vengthlang FC nen semifinal luh an inchuh ang. Nimin khan Venghlui FC-in kum zawna quarterfinal lut turin Ramhlun FC 5-0 in an sawp a, first division club hian quarterfinal-ah Sailam FC hnehtu Durtlang Leitan FC an hmachhawn ang.

Chhingcows leh goal

Lalsangzuala Hmar enkawl Chhinga Veng nena sawi zawm inhmeh tak chu goal a ni - MPL club hian Zarkawt FC 9-0 a an hneh hnuin Zo Dreams FC leh Chawnpui FC lakah goal 14 ve ve an khung.

Chhingcows khingpui Chawnpui hi first division club satliah an ni lo a, season liam taa MFA Super Cup-a semifinal lut thei an ni. Niminah pawh Chhinga Veng hian minute 5-na lekah hma hruai mah se darkar chanve hnuah Chawnpui hian 2-1 hma an hruai tawh. Sanga hote an theihna an lantir zui a, first half-ah 3-2 in an lehthal a, Chhingcows hian second half-ah goal 11 tehmeuh an khung belh leh bawk.

Nimin Inkhel Results
Lammual
Group B - Pool Final
Chhinga Veng FC 14 - 2 Chawnpui FC
CVFC : R. Malsawmtluanga 5', 66'; R. Laldinliana 41'; Laldampuia 45+2 ',61' ,63', 68'; Laldingngheta 51', 86'; MS Dawngliana 70', 81'; K. Lalthlahlova 75; Malsawmfela 89', 90'
CPFC: Lalthansanga 14'; Zarzokima 26'
Group C - Pool Final
Sailam FC 1 - 2 Durtlang Leitan FC
SAI : Vanlalthara 21'
LEI : Lalremmawia 51'; Francis Lalṭhazuala 77'
Group D - Pool Final
Venghlui FC 5 - 0 Ramhlun FC
VEN : Vanrammawia Ngente 10', 90+3'; K.Roluahpuia 24'; R. Lallawmawma 40+3'; Zahmingthansanga 81'