Quarterfinal thleng tur Ramhlun North FC? Chaltlang FC hmaah Dinthar FC

Vawiin hian Rajiv Gandhi Stadium-ah chiah Lalbiakliana Memorial MFA Super Cup khelh a ni dawn a, Ramhlun North FC-in tlai dar 3:00-ah Aizawl FC Academy an hmachhawn dawn a, MPL club hian hnehna an chang a nih chuan quarterfinal an lut ang.

Dinthar FC tan erawh vawiin hi an vawi hnih inlanna tur chauh a ni a, first division club Chaltlang FC lakah fiahna hautak zawk an hmachhawn dawn. MPL club hian pool final an lut thei a nih chuan Chite Veng GSA leh Ramthar Veng FC inkhela chak zawk an hmachhawn dawn a ni.

Fiahna chu

Dinthar FC-in an match hmasa berah 1st Bn MAP Football Academy an hmachhawn a, fiahna hmasa an paltlang.

Police Academy hian an fitness neih ṭhat hmang ṭangkaiin MPL club tan hun harsa an siam a, hun tawpah erawh tawnhriat ngah zawk Dinthar hian 4-0 in hnehna an chang.

Vawiinah Dinthar FC hian fiahna dang an hmachhawn leh dawn a, Chaltlang FC nen hi chuan fitness chauh ni loin 'tactical battle' awm pha tura ngaih a ni.

Maimawms coach Lalhlu­puia Sailo chuan, "Player siksawi nan kan hmang dawn a, match hmasa zawk aia ṭhaa khelh kan tuma ang," tiin a sawi.

Dinthar FC physio C. Lal­awm­­puia chu nimin zing khan a thi a, vawiin hian MPL champion hmasa ber hian an physio hriat reng nan armband dum an hreng ang.

Vawiin match hmasa berah Chite Veng GSA leh Ramthar Veng FC te an inkhel dawn a, he inkhela chak zawk hian last 16-ah Dinthar FC leh Chaltlang FC inkhela chak zawk an hmachhawn ang.

Ramhlun North an ṭha

Season liam ta khan Independence Day Football -ah coach Lalruatliana Sailo-in (Tawia) tawnhriat nei tam lo player kaihruai chungin Ramhlun North FC chu final a thlenpui. Amaherawhchu, MPL-ah player hming langsar an neih tam loh a lang a, team pariat awmna Mizoram league sang berah pasarihna an ni.

Tun season-ah erawh Ramhlun North an inzir a, kalphung nei ṭha coach Tawia chelhin player ṭha an pe tel bawk. MPL club hian team khaipha ni tur khawpa theihna nei V. Lalchhuanawma chu ONGC aṭangin an la lut a, tawnhriat nei ṭha Lalrinfela, MPL-a tawnhriat nei ṭha Jessy Vanlalmuana leh Rosangliana te bakah hmabak nei êng AIFF Academy chhuak Lalramzauva leh DSK Shivajians-a inzir tawh Lalliansanga te an kawl a, goal nawr na tur an ni.

Ramhlun North hian an match hmasa berah Republic Vengthlang FC chu 12-0 in an sawp a, Durtlang club FC Ramthar 3-0 in an hneh leh tawh bawk. Aizawl FC Academy tan MPL club hneh hi a harsa a ang.

Chutihrualin Aizawl FC Academy tan hlauhthawn tur a awm lo a, pressure an neih loh avangin an theihna tak an pho chhuak thei dawn. AFC Academy tan MPL club hneh hi an academy fakna ṭha tak a ni dawn a, MFA Grass­roots an hneh ṭuma hnawh­chhuah Lalramtiama leh Ricky Rohmingliana te chhawr thei dawn lo mah se tlawm saa khelmual an luh loh a pawimawh ang.