Arsene Wenger a lungawi

Alexandre Lacazette-a'n a club thar Arsenal tana a goal hmasa ber khung turin khelmual chhungah minute 15 bak a mamawh lo a, manager Arsene Wenger chu French forward khelh danah a lawm a, team boruak a ṭhat thu a sawi lang tel bawk.

Arsenal hi season thar inbuatsaih nan Australia-ah an zin mek a, Ningani tlai khan captain Per Mertesacker leh Lacazette te goal hmangin A League champion Sydney FC 2-0 in an hneh a. Vawiin tlai dar 3:30-ah Western Sydney Wanderers an hmachhawn ang.

Gunners manager Wenger chuan, "Striker hi chu goal khung tura beisei an ni a, Lacazette pawh match hmasa bera goal a khung nghal avangin a tan bul ṭanna duhawm a ni. Tlarhmaah chhawr tur kan nei hnem a, player tinin phur taka inelna an hmachhawn hmuh hi a nuam takzet," a ti.

Player thar Sead Ko­lasinac pawhin Sydney FC lakah a club tana a match hmasa ber a khel. Wenger-a'n season hmasa tawp lamah tlarhnungah defender lai pathum a chhawr a, season tharah hetiang thoa tlarhnung a rem chhunzawm a nih chuan Bundesliga club aṭanga Emirates Stadium pantu defender hi Gunners player pawi­mawh a ni phak ang.