Bonucci-a'n Milan a pan

Juventus defender rinrawl Leonardo Bonucci chuan AC Milan a zawm. Italy international hian nimin khan medical test nei turin Milan a pan a, he thu i chhiar meuh hi chuan contract an ziak fel hman tawh hial ang. Kum 30 mi Bonucci man zat hi pound maktaduai 35.2 niin kum nga daih contract ziak tura ngaih a ni.

Feet 6 leh inches 3-a sang defender hian Juve tan season sarih a hman chhungin inelna hrang hrangah match 319 khelin goal 21 a khung. Turin club tan hian Serie A nomawi paruk bakah Coppa Italia vawi thum chawiin Champions League final vawi hnih a khel bawk - season hmasa pawh khan player pawimawh berte zinga mi a ni.

Amaherawhchu, nikuma Parma nen league match an khelh ṭumin manager Massimiliano Allegri nen an inhnial buai a, hemi hnuah Champions League-a Porto an hmachhawn ṭumin thlan zingah a tel lo bawk! Manager nen an boruak a ṭhat miau loh avangin Juve hian an defender duhlai an chanah a ngaih theih.

Season thara Europa League khel tur Milan-in an squad an thuam chak mek a, Bonucci hma hian Andre Silva (£33.5m), Ricardo Rodriguez (£13.2m), Hakan Calhanoglu (£22m), Andrea Conti (£21.1m) leh Mateo Musacchio (£15m) te an lalut tawh bawk.