Conor McGregor ringtu UFC coach
August 26-ah boxing khawvela tawnhriat la nei lo UFC lightweight champion Conor McGregor leh boxer ropui Floyd Mayweather te an inhmachhawn dawn a, amateur emaw professional ang pawha la inhnek ngai lo McGregor hi chak lo turah mi tam takin an ruat - UFC lama amah kaihruaitu coach John Kavanagh ngaihdan erawh a dang thung.
John Kavanagh chuan, "Ngawrh takin training kan nei a, boxer ṭha tak tak inzir nan a hmang reng bawk. Kan beisei ang ngeiin a skills lamah pawh hma a sawn nasa a ni. McGregor hi Wimbledon nomawi chawi tum a ni lo," tiin a fighter chu thil theih loh tawp tih tum a nih loh thu a sawi.
Mayweather leh McGregor te hian media tour an nei mek a, Los Angeles, Toronto leh New York-ah tour nei zo tawhin nimin khan mipui sing rual hmaa incho tawn turin London an pan leh ta. LA khawpuiah McGregor-a'n Mayweather a knockout tur thu a tiam a, Toronto-ah pawh an la incho hle.
Toronto-a mipui 16,000 hmaah fighter pahnih hi elhsen tak takin an inṭawngkhum a, Mayweather hian McGregor-a'n chhuang taka UFC-a fight naa a lo ken tawh Republic of Ireland flag keng chhuakin Irish fighter hi a chhaih kual.
New York khawpuiah pawh fighter pahnih ṭawngkam hmang ringawta an inbei en turin mipui 13,165 an la pungkhawm cheu. He hunah hian a sum neih hmanga a khingpuite chhaih ṭhintu Mayweather chuan dollar note hmangin McGregor hi a uan khum!