AFC-in league pakhat neih a duh

Asian Football Confede­ration chuan India ramah league pakhat chauh awm tura an duh thu an sawi - tun dinhmunah India-in I League leh Indian Super League a nei mek a, league pahnih hi November aṭanga ṭanin a hran ve vea khelh tura ruahmanna siam a ni.

Mahse, tunah Asia khaw­mualpuia football thuneitu sang ber AFC-in thuchhuah an nei a, football khawvela thuneitu sang ber FIFA chuan AFC hi an thlawp bawk - AIFF hnena ti tura an hrilh chu 'a rang thei ang bera league pakhat' neih a ni. Indian FA hruaitute lu a hai khawp ang.

AFC an ti tak tak

Asian Football Confede­ration hian India rama football ṭhan dan an hre ve reng a, AIFF laka thurawn an pekah hian an ti mai mai lo. AFC aiawhte chuan August thla lai hawl hian India-in league pakhat a neih theih dan tur chungchang sawi turin India an rawn pan dawn.

AFC hruaitute hi October thlaa FIFA U17 World Cup India-in a thlen hunah an rawn kal leh ang a, he hunah pawh hian AIFF chu league chungchang bawk hi an sawipui ang. FIFA hruaitute pawh an tel tawh ang a, AIFF tan namnul mai mai chi a ni dawn lo.

I League club tan

Sum tam tak hloh inhuama rei tak chhung club lo nei tawh I League club ten tun hnaia AIFF hmalakna avangin phatsan niah an inngai a, Indian FA laka an lungawi lohna hi a nasa hle. Mahse, tunah AIFF chunglam aṭangin AFC an lo lang a, an thu ken chu league pakhatah chuan I League club pawh an tel ve tur a ni, tih a ni tawp mai.

AIFF lam hnai tak, a hming tarlan remchang lo chuan, "Hrilh hriat kan nih dan chuan AFC hian league pakhatah hian I League leh ISL awmho turin an duh a, league-ah chuan a tlem berah club 18 tal awm turin an duh bawk. Tun dinhmunah I League leh ISL-in club 10 ve ve an neih bawk avangin club 20 inelna league kan nei a nih pawhin a mak lo ang," a ti.

Intawnna hmasa

July 7 khan India rama FIFA U17 World Cup khelh tur pualin draw neih a ni a, he hunah hian AFC hruaitute chuan AIFF hnenah India rama league pakhat nei tura a rang thei ang bera hma la turin an hriattir. He hunah hian FIFA hruaitute pawh an tel a, AFC-in AIFF hnena thurawn an pek hi an hriatpui.

"AIFF-in I League leh ISL a hrana a ruala kal tura an tih chhan hi buai zualpui tihreh nan chauh a ni a, AFC chuan hetianga league rei tak kalpui hi a remti dawn lo. Ruahmanna fel tak a rang lama neih thuai hi AFC duhdan chu a ni," tiin AIFF hruaitu zinga mi pakhat chuan a sawi bawk.

Engtin zel?

Tun dinhmunah I League cham­pion-in AFC Champions League playoff an khel ang a, ISL champion-in Federation Cup champion ten an khelh ṭhin AFC Cup play off chu an khel ang, tih a ni bawk. Mahse, I League leh ISL top four ten Super Cup khelin Asia khawmualpuia India aiawh tur hi an zawng ang, tih a awm bawk a, hemi bikah hian thuchiang a la awm lo - hei zawng zawng hi AFC chuan tihchian thuai a duh.

Indian FA lama hotu pakhat chuan, "FIFA U17 World Cup khelh hunah FIFA hriatpuinain AFC lam hian Indian football kal zel dan tura an ruahmanna chu peih hman an beisei a, he ruahmanna hi AIFF executive committee hnenah thlen leh niin anni hi thutlukna siam tura beisei an ni dawn a ni," an ti.

A chiang lo

AFC lam thupui ber chu 'league pakhat neih' tih hi a ni tawp mai. Buaina pakhat erawh tun season-ah he 'league pakhat' hi neih theih a ni ang em? tih hi a ni. AIFF-in league pahnih nei turin ruahmanna thui takin a kalpui tawh a, AFC-in thuthar an neih leh takah chuan Indian FA hruaitute tan hmalak dan tur a chiang lo. November-ah league khelh ṭan tum a ni a, AFC-in October-ah thutlukna siam an tum chauh - hun a tepter tawh takzet.

Asian Football Confede­ration hian league chu an hriat­puina hnuaia khelh a nih dawn chuan 'pakhat' chauh nise an duh a, ram dangah league pakhat aia tam an hriatpuinain khelh a ni ngai lo - hei hi India rama tih bik an duh lo. "AFC duh ber chu league pakhat chauh neih a ni a, hei hi season thar aṭanga hman ṭan pawh a ni hial mai thei," tih hi ṭawngkam pakhat chu a ni a, season tharah league pakhat kan hmu a nih pawhin thil mak a ni dawn lo.