Watford-in Nathaniel Chalobah an lalut

Premier League club Watford chuan Chelsea aṭangin midfielder Nathaniel Chalobah an lalut a, a man zat hi puanzar ni lo mah se pound maktaduai ruk bawr vel ni tura ngaih a ni a, kum nga chhung khel turin contract a ziak.

Kum 22-a upa midfielder hi European Under 21 Championships, Poland-a khelh zawh taka semifinal lut England team-ah pawh khan a tel a, player hmabak nei eng tak a ni. Season hman zawh takah khan Blues tan league match 10 a khel ve.

Chalobah hi Watford-ah a mikhual dawn lo. Kum 2012-13 season kha Hor­nets-ah hian loan-in hun a lo hmang tawh a, inelna hrang hrangah match 42 ngawt a inlan sak. Stamford Bridge-ah hmun a chan phak meuh loh avangin club hrang hrangah loan-in hun a lo hmang kual tawh a, Watford bakah hian Nottingham Forest, Middlesbrough, Burnley, Reading leh Napoli-ah loan-in a lo khel tawh.