Trau-in Indian Arrows an hneh

Aizawl FC hmachhawn tur Tiddim Road Athletic Union-in I League-ah harhtharna an chang chho a, Pathianni khan Indian Arrows 2-0 in an hneh. Manipur club tan hian Ngambam Naocha Singh (45') leh Princewell Emeka Olariche (79') ten an khung a, Dimitris Dimitriou hoten January 25 hian Khuman Lampak Stadium-ah Aizawl FC an mikhual dawn.

I League kai thar Trau hian an match hmasa berah Chennai City (0-1) an hneh lo a, Mohun Bagan (0-4) leh East Bengal (1-2) te hneh lo zuiin match hmasa pathumah an chak lo vek.

Manipur club hian December thla khan an mualah Real Kashmir (2-2) an chelh a, kum 2020-a an match hmasa berah pawh Punjab FC nen an mualah goal awm loin an inhnehtawk. January 9-ah I League-a an chak hmasak ber an tawng a, Manipur Derby-ah an hmelma Neroca chu 2-1 in an lehthal a, point thum hlu bik tiin a sawi theih. Dimitris Dimitriou hote hian Indian Arrows an luhchhuah zui a, khualmuala an chak hmasak ber a ni.

Trau hian Aizawl FC an hmachhawn hmain  khualmualah Churchill Brothers an la tlawh dawn a, Mizo club erawh January 8-a Churchill Brothers nen an inhnehtawk aṭang khan an la awl char char. Tun dinhmunah AFC leh Trau hian match sarih khelhah point riat ve ve an hmu.

I League hmahruai mektu Mohun Bagan chuan vawiin tlai dar 2:00 hian Punjab FC an tlawh dawn a, coach Yan Law hote hian an mikhual an hneh chuan Kolkata club lian hi an nihrual thei ang. Neroca-in vawiin tlai dar 2:00-ah Real Kashmir an mikhual dawn a, table hnuai lam inkhel ni mah se team tin point hmuh a la inthlauh loh avangin a chak zawk tan dinhmun sanga invawrhna hun ṭha a ni ang. 

January 12, Pathianni

Indian Arrows    0  - 2    Trau

TRAU : Ngambam Naocha Singh 45'; Princewell Emeka Olariche 79'

Vawiin Inkhel Tur

Punjab FC    2:00 PM    Mohun Bagan

Neroca FC    2:00 PM    Real Kashmir

Team Dinhmun

#    Team    P    W    D    L    GF    GA    GD    Pts

1    Mohun Bagan    6    4    1    1    11    5    6    13

2    Churchill Brothers    5    3    1    1    11    6    5    10

3    Punjab FC    7    2    4    1    9    9    0    10

4    Chennai City    6    2    2    2    9    10    -1    8

5    Quess East Bengal    5    2    2    1    8    5    3    8

6    Aizawl FC    7    1    5    1    9    9    0    8

7    Tiddim Road Athletic Union    7    2    2    3    7    10    -3    8

8    Gokulam Kerala    5    2    1    2    7    7    0    7

9    Real Kashmir    5    1    3    1    6    7    -1    6

10    Nercoa    6    1    2    3    7    11    -4    5

11    Indian Arrows    7    1    1    5    4    9    -5    4