Champion ngamtu Arsenal

Arsenal chuan FA Cup champion lai Manchester City 2-0 a hnehin a vawi 21 nan final an lut a, sulhnu nei ṭha ber an ni. Gunners tan hian captain leh striker hriam ber ni bawk Pierre-Emerick Aubameyang-a'n goal hnih a khung.

Football knockout tournament upa ber hi August 1-ah a hmawr bawkna neih a ni dawn, nizan khan semifinal lehlamah Manchester United leh Chelsea an inkhel - a chak zawkin Mikel Arteta naute nen nomawi an inchuh ang.

Inrinni zan Wembley Stadium-a inkhelah Pep Guardiola kaihhruai Manchester City lamin ball chang tamin na takin an nawr tawm nghal, team nem zawka ngaih Arsenal lamin counter attack hmangin na takin an vaw let ṭhin thung.

Minute 19-naah Nicolas Pepe-a cross chu Aubameyang chuan angle zim tak aṭangin a tlawh lut, inkhelh hmaa vaupung ti na tak Kyle Walker-a'n tih theih a nei lo; Auba hian a hmain keeper Ederson chauh a hmachhawnin a khung lo bawk - a vawi hnihna leh harsa zawk erawh tawih zetin a khung.

Chawlhlawk hmain City lamin nawr zui mah se goal hlauhawm an nei thei lo. Second half-ah pawh inkhel kalphung a danglam tam lo, defender Kieran Tierney ball fing dawngtu Auba-a'n fal taka tlan puiin Ederson kap karah an goal hnihna a khung; Walker zawnah bawk City tlarhnung a pawp.

Goal khung ringawt mah se tlarhnung a phui loh chuan awmzia a awm lo - tun hma aṭanga Arsenal buaina a ni. Mahse, tun hnaiah erawh Arteta-a'n an tih theih pawimawh chu 'Bus Park' a ni tih hriain tlarhnung a rem, a ti sual lo viau. Premier League champion Liverpool leh Man City a zawnin an hneh.

David Luiz hmangin ball an sem ṭan a, Brazilian defender hi Arsenal fans lamin hmanni lawka chhuak tura an duh ngawih ngawih kha ni mah se tunah chuan chhanhimtu a ni leh tawh; Luiz hnung leh hmaa ding keeper Emiliano Martinez leh midfielder Granit Xhaka te pawimawhna hmuh hmaih theih a ni lo bawk.

Kum 31 mi Auba aia striker hriam thlan tur dang an awm chuang lo, season khat chauh daih contract nei tawh thlun ngheh hi an tih tur pawimawh a ni. Hlawh hnem, mahse chhawr mumal theih si loh Mesut Ozil laka sum an thehchhuah phal ang tal seng ngam se an tisual lo ang.

Arsenal dinhmun sawiin Liverpool defender hlui Jamie Carragher chuan, "Arteta-a'n Pep entawnin match tinah attacking game an khelh an ring vek, mahse tuna an player neih dan nen a rem si lo. Khelh dan phung thlakin tunah chuan ni li chhungin team ṭha pahnih an hneh," a ti, a ngaihdan ṭawmtu an tam a rinawm.

Pep Guardiola-a'n league lama hahdamna hun a pek Kevin De Bruyne, Raheem Sterling, Riyad Mahrez leh Aymeric Laporte ten inkhel bul an ṭan nghal vek a, harsa lutuk loin Gunners an tukdawl theih mai a rinawm hle.

Mahse, City-ah hian kim lo riau lai a awm, a hming chu Sergio Aguero a ni. Argentine striker hmunruak luahtu Gabriel Jesus a hriam tawk lo, ball chang hnemin nawr na viau ṭhin mah se a hmawr bawk thei an awm lo; uiawm takin a liam leh mai ṭhin.

Arsenal tlarhnung inremphui khup karah Mahrez-a'n hun ṭha insiam thei mah se goal kil taka a ball pet chu keeper Martinez-a'n a lo dang hman hlauh. De Bruyne-a ball pek David Silva khung loh te kha an ui khawp ang. Ball chang hnem mah se hlauhawm taka shot an nei hleithei lo a ni.

Liverpool lakah EPL nomawi an chan a, FA Cup an chawi lai chu Gunners ngam loh vangin an hloh leh ta bawk. Guardiola-a'n season duhawm lo an hman hliah khuh nan Champions League a la nei; UCL-ah an champion a nih erawh chuan inelna dang zawng aiin an ngaihlu ang.