Chak ngei ngei a ngai - Hamilton

Pathianni tlai dar 5:30-ah Formula 1 British Grand Prix tlan a ni dawn a, khawtual tlangval Lewis Hamilton chuan a tan chetsual a thian tawh loh thu a sawi.

World champion vawi thum ni tawh Hamil­ton hian driver championship-a hma­hruaitu Sebastian Vettel chu point 20-in a phak lo mek - champion tuma an inumna kawngah a bik takin Hamilton tan chetsual a hun tawh lo hle a ni.

British driver Hamil­ton chuan, "A pawimawh ber chu world champion nih theih a ni a, chumi tur chuan ka tan British Grand Prix-a hnehna chan a pawimawh hle. He hmunah hian a zawnin vawi thum hnehna ka chang tawh a, min ṭan­tu tam tak hmaah tun kartawpah pawh hian hnehna chan theih ngei ka inbeisei," tiin a sawi.

Federation Inter­natio­nale de l'Automobile (FIA) hnuaia car intlan­siakna ngaihhlut Formula 1 hi kum 1950 aṭanga neih ṭan a ni. Pathianni tlaia an tlanna tur Silverstone Circuit hi inelna hmasa ber an neihna hmun a ni a, hei vang hian an ngaihlu ṭhin hle.

Silverstone Circuit hi Northamptonshire, England bula thingtlang khaw pakhat Silverstone bula awm a ni a, tlan­kawng thui zawng hi 5.891km niin vawi 52 an tlan kual ṭhin. Hnehna chang hnem thei ber chu khawtual driver Jim Clark (5 wins) leh Alain Prost te an ni a, team lamah chuan vawi 15 chak tawh Ferrari chu sulhnu nei ṭha ber an ni thung.