Mizoram Lockdown (inkharkhip)

AC Milan legend Kaka-a'n kum 2009 khan a hming chherna Italian club hi chhuahsanin Real Madrid a zawm a, euro maktaduai 67 man player hian beisei anga a khel chhuak lo chungin a hnathawh erawh footballer tam tak 

tan inchhuanna tham a la tling tho. Brazilian midfielder hian Real-ah season li hun a hmang a, inelna hrang hrangah match 120 khelin goal 29 a khungsak - vawi 32 assist a nei bawk. Real tan hian La Liga (1) leh Copa del Rey (1) nomawi a chawi hman. 

Real aṭang hian a hming chherna AC Milan-ah bawk a kir a, match 37 khelin goal kua a khungsak. Italian club-ah season khat bak hun a hmang tawh lo a, Brazilian club Sao Paulo-ah a kal a, a hnuah MLS club Orlando City zawmin season thum a khel - kum 2017 khan inkhelh a chawlhsan. Kaka hian AC Milan tana a khelh laiin Serie A (1), Champions League (1), FIFA Club World Cup (1), UEFA Super Cup (1) leh Spanish Super Cup (1)-ah a champion. Kum 2007 khan Kaka tan chuan kum ṭha a ni - Ballon d'Or, FIFA World Player of the Year leh FIFPro World Player of the Year chawimawina a dawng vek a, FIFPro World XI leh UEFA Team of the Year-ah vawi thum ve ve a lang bawk. 

Brazil tan vawi 92 inlana goal 29 khungtu hian kum 2002 khan ram tan World Cup nomawi a chawi bawk a, kum 2005 leh 2009 khan FIFA Confederations Cup-ah an champion.